Ирландын Дублин хотноо болсон гэмт халдлагын улмаас Монгол Улсын иргэн амь насаа алдсан харамсалтай хэрэг гарчээ. Монгол Улсаас Ирланд Улсад хавсран суугаа Элчин сайд Н.Тулга эмгэнэл илэрхийллээ. Тэрбээр "Ирландын Дублин хотноо гэр бүлийн хамт амьдарч байсан Монгол Улсын иргэн Цэрэндорж овогтой Уранцэцэг 2021 оны 2 дугаар сарын 03-ны өдөр гэмт халдлагын улмаас амь насаа алдаж нөхөж баршгүй хүнд гарз тохиолдсонд талийгаачийн гэр бүл, үр хүүхэд, ах дүү, ураг төрөл болон найз нөхөд, Ирланд дахь Монголчуудад гүн эмгэнэл илэрхийлье. Ум сайн амгалан болтугай. Монгол Улсаас Ирланд Улсад хавсран суугаа Элчин сайд Н.Тулга" гэжээ. 

Талийгаач Ирланд улсын Дублин хотод 2006 оноос хойш гэр бүлийн хамт ажиллаж амьдарч байжээ. Тэрбээр Хөвсгөл аймгийн Рашаант суманд төрж, 1989 онд Хөвсгөл аймгийн Их-Уул сумын 10 жилийн сургууль, 1998 онд МУБИС-ыг Биеийн тамирийн багш, дасгалжуулагч мэргэжлээр суралцан төгссөн байна.  Улмаар Рашаант сумандаа биеийн тамирийн багшаар ажиллаж өсвөр үе, хүүхэд залууст сагсан бөмбөг, волейбол, теннисийн спортыг хөгжүүлэхэд залуу үеийг сурган хүмүүжүүлэхэд үнэтэй хувь нэмэр оруулсан нэгэн байжээ.