Шүүхийн шийдвэр гүйцэтгэх ерөнхий газрын санхүүгийн дотоод аудитын шалгалтаар маш ноцтой нэгэн зөрчлийг илрүүлсэн нь Санхүү, үйлдвэр, хөрөнгө оруулалтын газрын дарга дэд хурандаа С.Батбямбатай холбоотой байлаа. Бараа материалыг зах зээлийн үнээс нь хэт өндрөөр үнэлж, тэрбум орчим төгрөгийг хувийн байгууллага руу шилжүүлсэн байдаг юм. Хамгийн хачирхалтай нь энэхүү өндөр өртөгтэй бараа материал нь захиалагч талдаа буюу Шүүхийн шийдвэр гүйцэтгэх ерөнхий газрын харьяа хорих ангид огт нийлүүлэгдээгүй байсныг дотоод аудитын шалгалтаар тогтоосон.

Энэ дагуу Санхүү, үйлдвэр, хөрөнгө оруулалтын газрын дарга дэд хурандаа С.Батбямбад хариуцлага тооцох тухай дээд албан тушаалтнуудынх нь бичиг ч Шүүхийн шийдвэр гүйцэтгэх ерөнхий газарт ирсэн. Гэтэл Санхүү, үйлдвэр, хөрөнгө оруулалтын газрын дарга дэд хурандаа С.Батбямбад хариуцлага тооцох нь бүү хэл Захиргааны удирдлагын газрын даргаар томилсон байна.

Шүүхийн шийдвэр гүйцэтгэх ерөнхий газрын санхүүг атгаж байхдаа ганцхан үйлдлээр гэхэд тэрбум төгрөгийн зөрчил гаргаж байсан дэд хурандаа өдгөө Захиргааны удирдлагын газрын даргын албыг хашиж байгаа бөгөөд хурандаа цолтой болжээ.

С.Сүлд