Тендерийн бизнес цэцэглэсний тод илрэл нь 20 мянган төгрөгний үнэтэй амны хаалт болов

Нийслэлийн Эрүүл мэндийн газар нэг бүрийн үнэ нь 20 мянган төгрөгийн өртөгтэй 20 мянган ширхэг амны хаалт худалдан авах тендер зарласан нь олны анхаарлыг татаж, өндрийг авав.

Төрийн байгууллагууд тендер нэрээр мөнгө завшдаг асуудлыг үе, үе хөндөж, анхаарал татдаг ч тэгсхийгээд аниргүй болдог жишиг хэдийнэ тогтсон. Энэ байдлыг засч залруулах, тендер нэрээр мөнгө угаахгүй байх талаар яригддаг боловч мөн л хөрсөнд дээр буудаггүйн тод илрэл нь амны хаалтын тендер болов.

НЭМГ 20 мянган төгрөгний үнэ бүхий амны хаалтын тендерийг өнгөрсөн пүрэв гарагт зарлаж, өнөөдөр нээхээр төлөвлөж байсан аж. Ингэхдээ Сангийн яамтай зөвшилцсөний үндсэн дээр, Эрүүл мэндийн яамнаас ирүүлсэн тооцоо бүхий жагсаалтын дагуу тендер зарласан гэдгийг нийслэлийн Эрүүл мэндийн газрын даргын албан үүргийг түр орлон гүйцэтгэгч Л.Зэндмаа тайлбарласан. 

Тэрбээр “ЭМЯ-наас коронавирусний цар тахлаас урьдчилан сэргийлэх, хүндрэл багатай даван туулах арга хэмжээний хүрээнд хамгаалах хэрэгслийн гүйцэтгэх компанийг сонгон шалгаруулах, гэрээ байгуулах эрхийг энэ долоо хоногт манай байгууллагад шилжүүлсэн. Энэ нь микробиологийн лабораторид ажиллах эмч нарт зориулсан N95 маск юм. Ингэхдээ N95 маскийг 20 мянган төгрөгөөр худалдаж авах тооцоо бүхий жагсаалтыг ирүүлсэн. Эрх шилжиж ирсэн үнийн дүнгээр нь тендер зарласан. Ямар нэгэн байдлаар үнэ зохиож тавиагүй. ЭМЯ-наас тавьсан тусгай шаардлагын дагуу бид зарласан.

Хугацаа богино байсан тул Сангийн яамтай ярилцаад зөвшөөрөл авсны дагуу хоёрдугаар сарын 8-нд нээхээр зарласан. Шууд худалдан авалт хийх боломж бидэнд байсан. Гэхдээ хуулийн дагуу, магадгүй чанартай маск хямд оруулж ирэх зорилгоор тендерийг зарласан” хэмээн хээвнэг хэлээд сууж байх аж.

Түүний хэлснээр нэг бүрийн үнэ нь 20 мянган төгрөгөөр 20 мянган ширхэг амны хаалт худалдан авахыг Сангийн яам, Эрүүл мэндийн яам аль аль нь мэдэж, тэр  ч бүү хэл ЭМЯ-ны гаргасан жагсаалтаар тендер зарласан байх аж.

Үүнээс үзэхэд, амны хаалтны тендер үнэхээр үнийн хөөрөгдөлтэй, мөнгө угаах гэсэн бол дээрх газрууд үгсэн "хуйвалдсан" асуудал хөндөгдөж таарах нь. 20 мянган төгрөгний өртөгтэй амны хаалтыг НОК-ын дарга ч шүүмжилж, цар тахлын үед зарласан бүхий л тендер, худалдан авалтыг шалгуулахыг үүрэгдсэн.

Энэ талаар НОК-ын дарга Д.Сумъяабазар "Тендерийг ЭМЯ өөрсдөө зохион байгуулаач. Яагаад НЭМГ руу оруулж ирээд байгаа юм. Гадуур 20 мянган төгрөг гэж шуугиад байна. Тэгж болж байгаа юм уу. Та нар хулгайч болж байна шүү дээ одоо. ЭМЯ-нд нь буцаа. Дээр нь хууль хяналтын байгууллагаар оруул. Ашиг сонирхол байна гэж харж байна. Бидэнд ачаалал мундахгүй их байна. Иргэдийн амьдрал, улсын төсөв ямар байна. Хаана байна, нөгөө арви гамтай хэмнэлт чинь. Энэ чинь гурван яамны шийдэх асуудал. Яамдын бодлогын асуудал. Бид анхан шатан дээр ажилладаг" гэдгийг онцолсон. 

Тэгэхээр ЭМЯ, Сангийн яам нь өндөр өртөг бүхий амны хаалтын тендерийг НЭМГ-аар зарлуулж, "могой бариулах" гэв үү гэх хардлага төрж байгаа юм.

НОК-ын даргын хэлж буйгаар яамдын ажлыг НЭМГ хийж, ингэхдээ өндөр өртөгтэй үнээр худалдан авах гэсэн муу нэр нь тэднийх болж байгаа аж. Угтаа энэ бүхний цаана ЭМЯ, Сангийн яам нуугдаж буй бололтой. 

Б.Баатар