Баяр хийгээд гуниг хосолсон Төв талбайн өчигдрийн үйл явдал. Тэр хүн бүрд шалтгаан нь үл тайлагдах олон асуулт үлдээгээд одлоо. Эрхэлсэн тодорхой ажилгүй л гэнэ. Гэр дээрээс наймаа хийдэг л гэнэ. Бүр эхнэрээсээ салсан байсан л гэнэ. Ингэх л ёстой, үүнээс өөр гарц түүнд үлдээгүй мэт ярих нэгэн ч байна. Ямар байлаа ч гэсэн мэргэжлийн байгууллагын дүгнэлтийг хүлээх нь чухал.

Залуу хүн юуны учир олны нүдэн дээр өөрийгөө шатааж, амиа егүүтгэхэд хүрэв. Одоогоос 20 гаруй хоногийн өмнө Монгол Улсын 31 дэх Ерөнхий сайд У.Хүрэлсүхийн Засгийн газар танхимаараа огцорсон. Шалтгаан нь дөнгөж төрсөн эхийг таавчиг, халаадтай нь хүнлэг бусаар авч гарсан гэж тэр шүү дээ. Ингэхдээ тэрбээр төрийн дээд, доод түвшинд ажилдаа сэтгэлээсээ ханддаг байхыг уриалж, хэн нэг нь алдаа гаргавал огцордог, хариуцлага хүлээдэг гэдгийг өөрөөрөө үлгэрлэн сургамж болгож байна гэдгийг тодотгосон. Энэ бол өнгөрөгч сарын онцлох үйл явдал байлаа.

Дэлхий нийт цар тахалтай нүүр тулаад жил гаруйн хугацааг үдлээ. Харин манай улс дотооддоо цар тахал алдаад ердөө дөрөв сарын нүүр үзэх гэж байна. Бид 10 сар халдварыг дотооддоо алдаагүй гэх мөртлөө ирээдүйд учирч болох эрсдэлтэй хэрхэн нүүр тулах ямар ч бэлтгэлгүй байсан нь олон зүйл дээр харагдаж буй.

34-хөн настай энэ бүхнийг ойлгуулж, цочроо өгөх гэсэн харамсалтай үйлдэл ч юм бил үү.

Залуугийн цочир үйлдлээс өнөөгийн нийгмийн, иргэдийн амьдрал туйлдаж буйг, ар гэртээ хариуцлага хүлээх эр нөхрийн, хүүгийн үүргээ биелүүлж чадахгүйгээс өөрийнхөө амь насыг золиослох хүртэл сэтгэл санааны гүн хямралд орсныг харж болно. Харин Засгийн газар бүрэлдэхүүнээрээ огцордог асуудлыг эргэн сануулсан нь хэн нэгнийг огцор гэж шаардаж байгаа бус энэ залуугийн гашуун түүхийг үл умартаж, учир байдлыг нарийвчлан тогтоох, нийгэм, иргэдийн уур ундуйцал ийм байгааг сануулах гэсэн юм. 

А.Сүх