Төрийн байгууллага болон төрийн өмчийн компаниудын 22-50 насны ажилтнуудыг гудамж талбайд эргүүлд гаргахаар дайчилж эхэлсэн. Хамгийн гол нь энэ талаарх мэдээллийг урьдчилж өгөөгүйгээс төрийн албаныхныг бухимдуулж эхлээд байна.

Тодруулбал, гэр нь Баянмонгол хороололд байлаа гэхэд хаа байсан Баянхошуунд эргүүл гар, бас зусланд нялх хүүхдүүдтэйгээ байгаа эмэгтэйг маргааш өглөө 06 цагаас XXI хороололд эрүүл гар гэх зэргээр цагдаагийн байгууллагаас холбогдон мэдэгдсэн байна. Хаа хол газарт, дээр нь ямар унаагаар очих вэ, Баянхошуунд найман цагийн турш эргүүлд гарахад хаана орж дулаацах, хоол унд яах вэ, ОО хэрэгцээ гарвал зэрэг олон асуудал тодорхой бус байгаа нь иргэдийг бухимдуулаад эхэлжээ.

Гэрийнхээ ойролцоо эргүүлд гарна хэмээн төсөөлөлтэй байсан төрийн албаныхныг ийнхүү УОК-ынхны шийдвэр зутруулж, зохион байгуулалт үнэхээрийн муу гэдэг нь харагдаж байна.

Яамнаас нь эргүүлд дайчилна гэх бүүр түүр мэдээллийг ажилтнууддаа өгчихөөд яг ямар журам, цаг хуваарь, хаана гарах, юу бэлдэх зэрэг хэрэгцээт шаардлагатай гол зүйлсийг нь орхигдуулжээ.  Хамгийн гол нь дайчилж болно. Бүх зүйл нь тов тодорхой байх учиртайг, хүн гэдэг талаас нь хэрэгцээт асуудлыг нь шийдэх хэрэгтэй атал утасдаад шууд захиргаадаж буй нь хэр зохистой юм бол, УОК-ынхоон.

У.Тэргэл