Зам тээврийн хөгжлийн сайдын 2020 оны арваннэгдүгээр сарын 18-ны өдрийн А/222 тоот тушаалаар баталсан “Автотээврийн хэрэгслийн бүртгэл хөтлөх улсын дугаар олгох журам”-ын хүрээнд тээврийн хэрэгслийн улсын бүртгэлийн дараах дугааруудыг худалдах нээлттэй цахим дуудлага худалдааг зарласан. Энэ дагуу өнөөдрөөс 0001 УАР,  0011 УАР,  0041 УАР, 0071 УАР, 0101 УАР, 4141 УАР зэрэг азын дугааруудыг цахим дуудлага худалдаагаар нээлттэй худалдаалж эхэллээ.

Өнөөдрийн байдлаар, үдээс өмнө 10, үдээс хойш 10 азын дугаарыг дуудлагаар худалдаалах ба илүү дэлгэрэнгүй мэдээллийг  www.auction.transdep.mn вэб сайтаас авах боломжтой юм байна.

Гуравдугаар сарын 11-нийг хүртэл өдөр бүр азын 20 дугаарыг худалдах ба өнөөдрийн цахим дуудлага худалдаанд 409 хүн оролцож, яг одоогийн байдлаар 0001 УАР азын дугаарын үнэ 370 сая төгрөгт хүрч, дуудагдаж байна. Дуудлага худалдаанд оролцох иргэдэд хэрэгцээт доорх мэдээллийг хүргэе.

• Дуудлага худалдааны цахим хаяг:  transdep.mn
• Дуудлага худалдаанд тавих дэнчингийн хэмжээ: 50.000 төгрөг
• Дуудлага худалдааны бүртгэл: Оролцогчдыг дуудлага худалдаа явахаас гурван хоногийн өмнөөс хүлээн авч бүртгэн, дэнчинг хүлээн авах бөгөөд дуудлага худалдаа явах өмнөх өдрийн 23:00 цагт бүртгэлийг хаана. /Хугацаа хоцорсон хүсэлтийг хүлээн авах боломжгүйг анхаарна уу./
• Худалдан авах гэрээний нөхцөл: Хамгийн өндөр үнэ өгсөн оролцогч тухайн дуудлага худалдааны ялагч болох бөгөөд худалдан авсан улсын дугаарын үнийг 24 цагийн дотор төлж, “Улсын бүртгэлийн дугаар олгох гэрээ” байгуулснаар баталгаажна.

У.Тэргэл