Автомашиндаа азын дугааргүй бол хэн ч биш болчих гээд байдаг нэрэлхүү монгол зан гэж. Автомашин нь азын дугаартай, утасных нь дугаар ч азынх, тэр дундаа 9911, 8811-тэй бол бүр толгой дээгүүр гэдгэр алхаж болно. Энэ бүгд баян тарган, бэл бэнчинтэйг нь төвөггүй илтгэнэ.

Энэ бүхнийг өнөөдрийн азын дугаарын дуудлага худалдаа ил тодоор харууллаа. Тэднийг буруутгах аргагүй ч монголчуудын амьдрал  тэгтлээ дорд орчихоогүй. Хагас тэрбум орчмын үнэтэй азын дугаарыг автомашиндаа зүүчих хэмжээний баярхуу баячууд бишгүй байгаа бололтой. Өнөөдрийн дуудлага худалдаагаар гэхэд л, 0001 УАР серийн дугаар 375 саяд хүрч, 0101УАР серийн дугаар хоёр өрөө байрны үнэ буюу 64,1 сая, 0011 УАР серийн дугаар 70 сая, 7171УАР серийн дугаар 35,5 саяд хүрлээ.

Өмнө нь автомашины азын дугаарыг арын хаалгаар өндөр үнээр зардаг, худалдан авдаг бизнес газар авч, Авто тээврийн үндэсний төвийн албан хаагчид оройлон оролцдог байлаа. Үүнийг таслан зогсоохын тулд далд байсан азын дугаарын бизнесийг ил болгохын тулд нээлттэй дуудлага худалдаагаар худалдахаар болсон билээ.  Энэ нь ч шударга хэмээн үзэгсэд олон байсан.

“Азын” тоонд тэгтлээ ач холбогдол өгдөг, баярхуу монголчууд цаашид задрах серийн 1111УАР, 5555УАР, 8888УАР, 9999УАР дугаарт тэрбумыг өгөхөд ч бэлэн байна.

У.Тэргэл