Зөвшөөрсөн 14 салбарын ажилтнууд өнөө өглөө ажилдаа явах гэхэд тэднээс PCR шинжилгээний хариу нэхэн, хөдөлгөөнд оролцуулахгүй байсан нь хүмүүсийг ихээхэн бухимдууллаа. Нийтийн тээврээр үйлчлүүлэх гэхэд л иргэний үнэмлэх, шинжилгээний хариу нэхэж, өмнө өгсөн шинжилгээ 72 цагийн л хүчинтэй.Тиймээс дахин өг хэмээн асуудлыг гажуудуулагчид тулгаж,иргэд ажилдаа очихын тулд аргагүйн эрхэнд дахин шинжилгээ өгөх гэж бөөн бужигнаан үүсгэсэн юм.

Өглөөнөөс хойш иргэдийг бухимдуулсан энэ асуудлыг Хотын дарга Д.Сумъяабазар газар дээр нь ажилласнаар шийдэж өглөө. Тэрбээр “Нэг өрхөөс нэг хүн хамрагдсан бол гэр бүлийн бусад гишүүн шинжилгээнд хамрагдсан гэх бичгийг аваад эмийн сан, эмнэлгээр үйлчлүүлэх эрхтэй” гэлээ.   Гэтэл хүн бүрээс PCR шинжилгээ авна гээд хэн гээч ухаантай нь хэлчихээ вэ. Хоёрдугаар сарын 8-наас хойш хийсэн PCR шинжилгээ хүчин төгөлдөр. PCR шинжилгээ 72 цаг л хүчинтэй гэсэн зүйл байхгүй. Би тэгж хэлээгүй. Хэн ярьсныг тодруул” хэмээн Нийслэлийн Засаг дарга Д.Сумъяабазар холбогдох албаны удирдлагуудад үүрэг өглөө.

Энэ мэт тушаал, шийдвэрийг дундаас нь гуйвуулж, түүнийгээ мөрдөхийг иргэдэд тулгаж, хүндрэл учруулж буй албан тушаалтан харамсалтай нь, олон ажээ. Тэдний балгаар хотын удирдлагууд газар дээр нь очиж байж, асуудлыг нэг мөр шийддэг энэ явдал зуршил болохвий. 

У.Тэргэл