ЭМДЕГ-ын дарга Л.Бямбасүрэн зүрхний гажигтай төрсөн бяцхан үрсэд амьдрал  хайрлах  нэгэн таатай мэдээг дуулгалаа. Тэрбээр “ Зүрх мартахгүй төслийн хүрээнд олон хүүхдэд амьдрал хайрласанд талархал илэрхийлье. 2021 оны нэгдүгээр сарыг 22-ний өдрийн ЭМДҮЗ-ийн хурлаар  “Төлбөрийн хэмжээ, жагсаалт, өртгийн жин, журам шинэчлэн батлах тухай” тогтоолын төслийг танилцуулж, дэмжин баталж, ХЗДХЯ-нд бүртгүүлэхээр хүргүүлсэн. Энэ тогтоолд “Зүрхний болон гол судасны төрөлх гажгийн мэс заслын эмчилгээг Эрүүл мэндийн даатгалын сангаас 100 хувь хариуцахаар болсон таатай мэдээг дуулгая” гэв.

Зүрхний төрөлхийн гажигтай төрсөн хүүхдүүдийг аврах, амьдрал бэлэглэх зорилготой “Зүрх мартахгүй” төслийг монголчууд андахгүй болсон. Б.Болдсайхан эмчийн санаачлагаар эхлүүлсэн “Зүрх мартахгүй” төслийн баг анх 40 гаруй хүүхдэд мэс засал хийнэ хэмээн тооцож байсан ч өнөөдрийн байдлаар 47 хүүхдэд мэс заслыг амжилттай хийжээ.

Зүрхний төрөлхийн  гажигтай төрсөн хүүхдэд хийх хагалгааг БНХАУ-д  40-60 сая, БНСУ-д 80-240 сая төгрөгөөр хийдэг бол манай улс үүнээс 10-20 дахин бага өртгөөр буюу 10 сая төгрөгийн зардлаар хийдэг. Гэвч энэ мөнгийг төлөөд мэс засал хийлгэх боломжтой хүн цөөн байсан. Харин одоо эрүүл мэндийн даатгалын сан 100 хувь хариуцахаар болсон нь нэн таатай мэдээ юм.

 У.Тэргэл