“Өргөө” амаржих газрын эмч, ажилтнууд одоо л нэг амьсгаа авч, “Г.Баясгалан даргаас салж, санаа амарлаа” гэцгээж байна. Сандал, ширээтэйгээ зууралдсаар байсан Г.Баясгалан дарга нярайн амийг эрсдүүлэн байж даргын сэнтийгээсээ буусан нь энэ. Тодруулбал, тус амаржих газарт хоёрдугаар сарын 14-нд төлөвлөгөөт хагалгаагаар төрөх заалттай байсан эмэгтэйг зөрүүдлэн байж өөрөөр нь төрүүлснээс болж нярай эндсэн харамсалтай хэрэг гарсан. Тиймээс Нийслэлийн эрүүл мэндийн газрын дарга Б.Бямбадорж  тушаал  гаргаж, тус амаржих газрын дарга Г.Баясгаланг  ажлаас нь  чөлөөлсөн юм.

НЭМГ-ын дарга Б.Бямбадорж  “Өргөө амаржих газарт эх хүүхдийн амь нас, эрүүл мэндтэй холбоотой ноцтой алдаа удаа дараа гарлаа. Тиймээс эдгээр алдаа дутагдлыг цаашид гаргуулахгүйн тулд удирдлагын шинэ менежмент хийхээр болсон. Эхний ээлжид амаржих газрын даргад  хариуцлага тооцон,  дараагийн удирдлагыг томилох хүртэл Нийслэлийн Эрүүл мэндийн газраас менежментийн баг ажиллана” гэлээ.

Г.Баясгалан даргыг хариуцлага алдсан үндэслэлээр өмнө ажлаас нь чөлөөлсөн. Харин тэрбээр үндэслэлгүйгээр халлаа хэмээн шүүхдэн ялснаар ажилдаа эргэн ороод гурван сар болж байтал төрөөд удаагүй эхийг нярайн хамт өвлийн хүйтнээр нөмгөн авч гарсан  нь нийгмийг бухимдуулсан билээ. Хэрцгий энэ үйлдлээс болж эрүүл мэндийн салбарын удирдах олон албан тушаалтныг чөлөөлсөн. Харин Г.Баясгалан дарга ажлаа өгөхгүй хэмээн гүрийсээр үлдсэн юм.

Гэвч нэг бүдэрвэл долоо бүдэрнэ гэгчээр араас нь коронавирусний халдвартай эмэгтэйг ХӨСҮТ-рүү шилжүүлэлгүй эмнэлэгтээ төрүүлсэн хэрэг мандаж, удалгүй нярай амиа алдлаа.

Харин хариуцлагыг хэн хүлээх вэ. Энэ асуудал орхигдсоор ирсэн, харин албан тушаалаас нь чөлөөлсөн болж хариуцлагаас мултардаг ийм явдлыг хэзээ таслан зогсоох вэ.

У.Тэргэл