Хаврын тэргүүн сарын шинийн зургааны Дашнямтай эл өдөр Ховд аймагт гурван ихэр хүүхэд мэндэлжээ. Тодруулбал, Ховд аймгийн Цэцэг сумын харьяат Жаргалант сумын Бугат багт оршин суух иргэн Б.Отгонпүрэвийн гэр бүлд гурван ихэр хүүхэд мэндэлсэн баярт үйл явдал тохиожээ. Ихрүүдийн хоёр нь хүү, нэг нь охин аж. Эхний хүү энэ өглөө 09:09 цагт 1кг 830гр, хоёрдахь хүү нь 09:11 цагт 2кг 110гр, гуравдахь охин нь 09:13 цагт 1кг 850 гр тус тус мэндэлсэн байна. 

Ихрүүдийн ээж Б.Оюунгэрэл нь өдгөө 30 настай. 2012 онд ихэр охин, 2017 онд хүү төрүүлж байсан бол өнөөдөр гуравдахь төрөлтөөрөө гурван ихэр төрүүлж, ийнхүү зургаан хүүхдийн ээж болж байгаа юм байна. 

Гурван ихэр хүүхдийг тус аймгийн эх баригч Ц.Нарангэрэл, Төрөх тасгийн эрхлэгч Б.Нансалмаа, эх баригч Д.Наранхүү, нярайн эмч Ц.Солонго нар эх барьж, эсэн мэнд амаржуулсан байна. 

Б.Баатар