Нийслэлийн Засаг дарга С.Батболдын захирамжаар Тогмидын Гантөмөрийг Улаанбаатар хотын Ерөнхий менежер бөгөөд Захирагчийн ажлын албаны даргын албан үүргийг түр орлон гүйцэтгэгчээр 2016 оны долоодугаар сарын 26-ны өдөр анх томилж байв. Энэ цагаас хойш таван жил орчмын хугацаа өнгөрчээ. Хийж, бүтээе гэсэн хүнд ихийг амжуулах цаг хугацаа. Аргацааж, алдар нэр олох гэсэн нэгэнд бас л чамгүй хугацаа. Харин Хотын ерөнхий менежер Т.Гантөмөр даргын хувьд аль нь бол.

Т.Гантөмөр даргын ажлын үнэлгээ хогоор дүүрсэн гуу жалга, хазгай муруй зам талбай юү?

Улсын маань нийслэл Улаанбаатарын хөгжил цэцэглэлт, өнгө зүс, тохижилт ямар байх нь Улаанбаатар хотын Захирагчийн ажлын алба тэр дундаа Т.Гантөмөр даргаас шууд хамааралтай. Нэг үгээр, түүний ажлын үзүүлэлт гэж ойлгож болно. Нийслэлийн төсөвт өнгөрсөн хугацаанд хот тохижилтод хангалттай хөрөнгийг суулгаж өгчээ. Жишээ нь,

-2017 онд  хот тохижилтод зориулж 33.3 тэрбум төгрөгийг,

-2018 онд 40.1 тэрбум төгрөгийг,

-2019 онд 45.1 тэрбум төгрөгийг тус тус төсөвлөсөн байна. Энэ нь Т.Гантөмөр даргын ажлаа авснаас хойш түүний мэдэлд ирсэн хөрөнгө гэж ойлгож болно. Үндсэндээ гурван жилийн хугацаанд гэхэд 110 гаруй тэрбум төгрөгийг төсөвлөжээ. Харин нийслэлд маань ямар бүтээн байгуулалт сүндэрлэв. Нийслэлчүүдийн тав тухыг эрхэмлэсэн юуг цогцлоов. Харин ч эсрэгээрээ хогондоо дарагдсан гуу жалга, хазгай  муруй явган зам, өнгө үзэмжгүй хайс, хашаа, өвөлдөө мөсөн гудамж, талбайгаар иргэд нь бөөвийн алхана. Тэшиж унахаас эмээсэндээ тэр. Ийнхүү тоочвол дуусахгүй. Ганцхан жишээг иш татъя.

Нэг л өглөө нийслэлийн төв замын голоор өнгө үзэмжгүй шар хайс эгнэж байв. Энэхүү тусгаарлах хайсыг урд хөршөөс 760 сая төгрөгөөр импортолсон байдаг. Гэтэл үнэтэй хайс нь ердөө ганцхан шөнийн дотор унасан. Үүнийг холбогдох албаныхан “бэхлээгүй байсан” гэж тайлбарлаж байлаа. Угтаа бол уг хайс 88-600 юанийн үнэтэй байдаг. Олны нүдэнд ажил хийсэн болж харагдах гэж зөвхөн хотын төвөөр хэсэгчилж тавьчихаад, үүндээ 760 сая төгрөг зарцуулсан хэмээн ярьж суусан Т.Гантөмөр даргын өмнөөс олон хүн ичсэн. Мэргэжлийн хүмүүсийн хэлснээр, дээрх шар хайснуудыг  хамгийн өндөр зардлаар тооцоход л 300 сая төгрөг гэдэг.

Б.Батгэрэл: Хотын менежер 2 тэрбумын үйлчилгээний ажлыг тендергүйгээр шууд олгосон

Улаанбаатар хотын Ерөнхий менежер Т.Гантөмөртэй холбоотой гомдол Баянзүрх дүүргийн Y хорооны иргэн Б.Батгэрэл Авлигатай тэмцэх газарт хүргүүлсэн байдаг. Уг баримтыг бүрэн эхээр нь дэлгэе. Улаанбаатар хотын Ерөнхий менежер Т.Гантөмөр “Зам талбайн цэвэрлэгээний хуваарь батлах тухай” А/21 дугаартай тушаал гаргахдаа Нийслэлийн Засаг даргын 2017 оны нэгдүгээр сарын 12-ны өдрийн А/28 дугаар захирамжийн нэгдүгээр захирамжаар баталсан “Улаанбаатар хотын захирагчийн ажлын албан дүрэм”-ээр олгоогүй эрхийг хэрэгжүүлж, Төрийн болон орон нутгийн өмчийн хөрөнгөөр бараа болон ажил үйлчилгээ худалдан авах хуулийг зөрчин, Эрүүгийн хуулийн тусгай ангийн 22 дугаар зүйлийн 22.1-т заасан “Албан тушаалын байдлаа урвуулан ашиглаж, бусдад давуу байдал бий болгох” гэмт хэргийн шинжтэй үйлдэл хийсэн. Тодруулбал, Ерөнхий менежер Т.Гантөмөр нь уг тушаалаараа “Улаанбаатар шинэчлэл” ХХК-иас 583.237.500 төгрөг, “Грейт роуд” ХХК-иас 689.655.000 төгрөг ”Эко орчин” ХХК-иас 273.700.000 төгрөгийн үйлчилгээг тендерийн сонгон шалгаруулалтгүйгээр шууд Улаанбаатар хотын Захирагчийн ажлын албаны хот тохижилтын 2018 оны төлөвлөсөн зардлаас худалдан авахаар шийдвэрлэсэн байна. Үүнээс харахад Ерөнхий менежерийн энэхүү тушаал хоёр хуулийн заалтыг ноцтой зөрчсөн бөгөөд тэрбээр эрх мэдлээ урвуулан ашиглаж, дээрх хуулийн заалтыг зөрчин хоёр тэрбум гаруй төгрөгийн үйлчилгээний ажлыг Нээлттэй сонгон шалгаруулах тендер явуулалгүй шууд олгосон. Энэ нь хууль зөрчсөн ноцтой үйлдэл юм. Энэ асуудлыг шалгаж өгнө үү” хэмээн Авлигатай тэмцэх газарт хандсан билээ.

Ж.Энхбат: Т.Гантөмөр дарга ашиг хонжоо хайж, улсад 400 сая төгрөгийн хохирол учруулсан

Иргэн Ж.Энхбат АТГ-т хандсан билээ. Тэрбээр “Улаанбаатар хотын Захирагчийн ажлын алба, тус байгууллагын дарга Улаанбаатар хотын Ерөнхий менежер Т.Гантөмөрийн хууль зөрчсөн үйл ажиллагаанд холбогдуулж, дор дурдсан гомдлыг гаргасан юм. Үүнд, Улаанбаатар хотын Захирагчийн ажлын албанаас Улаанбаатар хотын тохижилт, ногоон байгууламж, замын ажил гүйцэтгүүлэхээр нэр бүхий хуулийн этгээдэд 2018 онд 400.3 сая төгрөгийн санхүүжилтийг олгосон байх бөгөөд ингэхдээ эрх мэдэл, албан тушаалын байдлаа урвуулан ашиглаж, холбогдох хуулиудыг зөрчсөн болно. Хотын Ерөнхий менежер Т.Гантөмөр нь ашиг хонжоо хайж, улсад 400 сая төгрөгийн хохирол учруулсан гэж үзэх бүрэн үндэстэй” хэмээсэн байдаг. Овоо босгоогүй бол шаазгай юунд суух вэ гэдэгчлэн Т.Гантөмөр даргын ашиг сонирхлын зөрчил, авлига, хээл хахуулийн хэргийг нь баримттайгаар холбогдох газарт өгсөн нь ганц, хоёроор тогтохгүй.

Ажил нь явдаггүйн дээр ааш нь дийлддэггүй

Т.Гантөмөр даргын ажил нь явдаггүйн дээр нь ааш нь дийлддэггүй гэдгийг хэвлэлийнхэн бүгд мэднэ. Тэрбээр ажлаа хийж явсан сэтгүүлчдэд нэн дээрэнгүй ханддаг, зандарч загнах, бүр цохиод авах энүүхэнд. Нэгэн жишээ. Салбарын сайд болон холбогдох газрын удирдлагууд Хавдар судлалын үндэсний төвд ажиллах үеэр зураглаач, сэтгүүлчид Ж.Чинбүрэн захирлаас ярилцлага авч байлаа. Энэ үед камерыг нь хааж, хөндөлсөөд  байсан Т.Гантөмөр  даргыг “Та жаахан хойшоо болоод өгөөч. Дүрсэнд саад болоод байна” гэсэн UBS телевизийн зураглаач залууд “Чи миний ажлыг заадаг хэн юм бэ” хэмээн олны дунд биед нь халдаж байв. Ажил үүргээ гүйцэтгэж буй хэвлэлийнхнийг хүндэтгэдэггүй юм гэхэд ааг омгоо үзүүлэхгүй байх ухамсар "эрхэм" Хотын ерөнхий менежерт өчүүхэн ч байхгүй нь харамсалтай.

Өөрийгөө рекламдахын хэнээт

Ийм нэгэн нэршлийг түүнд өгсөн байсныг санаж байна. Энэ нь ч утга учиртай. Тодруулбал, эрхэм дарга нэгэн өдөр жигтэйхэн ажил хэрэгч болж харагдах гэж хөгөө хөлдөө чирсэн байлаа. Гадаад хэлбэрт хэт анхаарч, рекламаа хэтрүүлсэн Т.Гантөмөр дарга гүүрэн гарцны нөхцөл байдалтай танилцсан аж. Үүнийгээ Захирагчийн ажлын албаны цахим хуудаст нийтлэн, иргэдээс ирсэн гомдлын дагуу гэж сүрхий тодотгоод “Цэвэрлэгээ муу, шат орчны гэрэлтүүлэг унтарсан, хана туурганд шүршдэг будгаар зураг, бичиг зурсан байна. Зарим хэсэгт хөрсний ус нэвчиж, замаск хууларсан зэрэг зөрчил илэрлээ” хэмээжээ. Ихийг хийж, олон зөрчил илрүүлсэн байгаа юм. Хамгийн гол нь мэдээлэлдээ хавсаргасан бүх зурагтаа тэрбээр  өөрийгөө ажил хэрэгчээр тодоос тод харуулахаа мартсангүй. Бас малийтал инээсэн.

Эцэст нь,

Ерөнхий сайд Л.Оюун-Эрдэнэ албан тушаалдаа тэнцэхгүй, рекламны ярилцлага, мэдээллээр ажлаа явуулдаг дарга нарыг ажлаас нь чөлөөлөх хэрэгтэй. Үүний нэг нь Хотын ерөнхий менежер хэмээн тодотгоод мэргэжилдээ гаргуун,  залуу боловсон хүчин олон. Тэдгээрт зайгаа тавьж өгөх хэрэгтэй хэмээж байв. Үнэний ортой л юм.   

У.Тэргэл