Коронавирусний халдварыг дотооддоо анх “Энхсаран” сувиллаас алдсан. Халдвар хамгааллын дэглэмийг сахиулаагүй, тусгаарлалтад байгаа иргэд хонжвортой тоглож, өрөө өрөө хэсч байсныг УОК-ын дарга асан Я.Содбаатар мэдэгдэж байсан билээ. “Энхсаран”  сувиллыг 2007 оны тавдугаар сарын 21-нд Шүдний холимог үзлэг, оношилгоо, эмэгтэйчүүдийн үзлэг, өвчний оношилгоо, эмчилгээний чиглэлээр авч анх нээж байжээ. Улмаар 2018 онд Ахмад настны амралт, сувиллын үйлчилгээ үзүүлэх байгууллага сонгон шалгаруулах 800 сая төгрөгийн төсөв бүхий тендерт шалгарч, үйл ажиллагаагаа эхлүүлээд хоёр жил болж байсан билээ. Хариуцлага алдсан тус сувиллын захирал О.Түмэнбаярт цагдаагийн байгууллагаас эрүүгийн хэрэг үүсгэн шалгаж, прокуророос 1-5 жилийн хорих ял төлөвлөөд байсан юм.

Дараагийнх нь Баянзүрх дүүргийн “Баянзүрх” нэгдсэн эмнэлэг. Баянзүрх дүүргийн 360 гаруй хүн амын ханддаг ганц эмнэлэг нь гэж хэлж болно. Ариутгал халдваргүйжүүлэлтийг дээд зэргээр хийж,  цар тахлын үеийн дэглэмийг чанд сахин мөрдөх  учиртай тус эмнэлгийнхэн харин ч эсрэгээрээ халдварын томоохон голомт болсон. Тодруулбал, тус эмнэлэгт эмчлүүлж байсан 82 өвчтөн, 19 эмч, сувилагч болоод 24 сахиур, 28 гэр бүлийн хамаарлын гээд нийт 184 хүн тус голомтоос халдвар авсан юм. Хариуцлагагүй гэхэд дэндүү энэ байгууллагын удирдлагууд эрүүл мэндийн  зөвлөх ажилтнууд, профессор, доктор. Харамсалтай нь, тэдэнд ашиг хонжоо, мөнгө л хэрэгтэй байсан болохоос бусдын эрүүл мэндийг үл ойшоосон билээ. Энэ ноцтой үйлдэлд нь эмнэлгийн удирдлагуудад цагдаагийн байгууллагаас эрүүгийн хэрэг үүсгэн шалгаж эхэлсэн. Тодруулбал, эмнэлгийн ерөнхий захирал Б.Даш-яндаг, гүйцэтгэх захирал Ө. Туул нарт эрүүгийн хэрэг үүсгэн, эмнэлгийн эмч, ажилтнуудаас мэдүүлэг авч байгаа. Уг хэргийг мөрдөн шалгах ажиллагаа үргэлжилж байна. Учир нь, мөрдөн шалгах асуудал олон, байцаалт авах хүний тоо ч их гэдгийг УОК-ын экс дарга Я.Содбаатар мэдэгдэж байсан билээ.

Харин дараагийнх нь Төмөр замын болон ХӨСҮТ-ийн халдварын голомт. Улсад олон тэрбумын хохирол учруулсан, цар тахлын үеийн хууль журмыг мөрдөөгүйгээс халдварыг санаандгүй, санаатай байдлаар тарааж, олон зуун хүний амь насыг эрдсэлд оруулсных нь төлөө хариуцлага тооцох учиртай. Харин энэ бүхэн албан тушаалаасаа чөлөөлөгдсөн УОК-ын экс дарга Я.Содбаатартай хамт  сураг алдрахгүй гэж найдъя.    

У.Тэргэл