Ковид-19-ийн эсрэг вакцины тухай БШУ-ны доктор, профессор, МАУ-ны академийн гишүүн Ж.Оюунбилэг мэдээлэл өглөө.

Тэрбээр “Аливаа халдварт өвчний үед тухайн хүн амын 70 орчим хувьд нь дархлаа тогтоовол намжина гэж үздэг. Дархлал тогтоох арга нь вакцинжуулалт юм. Шинжлэх ухаан технологийн хөгжлийн үр дүнд олон төрлийн вакцин бэлэн боллоо.

Тухайлбал, “Moderna” компанийн вакцин 13 мянган хүн, “Pfizer”-н вакцин 43 мянган хүнийг гуравдугаарт шатны туршилтандаа хамруулж ДЭМБ-ын яаралтай хийх вакцины зөвшөөрөл аваад байна. Мөн өөр хэд хэдэн вакцин бий.

Эдгээрийн аюулгүй байдлыг эмнэлзүйн 1, 2, 3 дугаарт шатанд судлан тогтоосон. Манай улсын Эмийн тухай хуульд зааснаар аливаа эмийн бэлдмэлийн аюулгүй байдлыг Үндэсний хяналтын лаборатори судлан тогтоох ёстой. Зөвхөн лабораторийн шинжилгээ хийсэн эмийг бүртгэнэ гэж заасан байдаг. Харамсалтай нь 1976 онд НЭМҮТ-д байгуулсан Биобэлдмэлийг шалгах улсын лаборатори 1996 онд МХЕГ-ыг дагаж очсоноор ажиллахгүй болсон. Тиймээс МХЕГ чадахгүй бол эрүүл мэндийн байгууллага дахин байгуулахад бэлэн байгаа.

Эдгээр вакцины найрлага болон дээр дурдсан үзүүлэлтийг олон улсын болон Үндэсний хяналтын байгууллагууд нь судалж, хангалттай болохыг судлан тогтоосон байна. Дархлал тогтоогч уураг болон түүнийг хадгалагч, тогтворжуулагч зарим төрлийн бодисыг нэмж өгдөг арга зүй байдаг. Эдгээрийн үр дүнд өмнө нь хэрэглэж байгаагүй, шинжлэн ухааны хөгжлийн үр дүнд бий болсон векторын вакциныг хэрэглэх нөхцөл бүрдлээ.

Манай улс дөрвөн төрлийн вакциныг хэрэглэхэд бэлэн болж байна. Өвчлөл өндөр байгаа АНУ, Энэтхэг, Бразил, ОХУ, Их Британи зэрэг улсад вакцинд олон сая хүнээ хамруулаад байна. Мөн Япон, Солонгос зэрэг азийн өндөр хөгжилтэй орнуудад дархлаажуулалт явж байна.

Үүний үр дүнд дэлхий дахинд халдварын тохиолдол 15 хувиар буурсан.

ОХУ-д хүн амынх нь хоногт гарч байгаа тохиолдол 50 гаруй хувиар буураад байна. Цаашид хэрэглэхэд бэлэн болсон дөрвөн төрлийн вакциныг хэрэглэснээр халдварыг хяналтандаа авахад тус дэм болно. Тиймээс дээрх вакцинуудыг тариулж, аюулт өвчнийг ялахад хувь нэмэр болохыг уриалж байна. Монгол Улс дэлхий дахинд бүр мөсөн устахаас 40 жилийн өмнө цагаан цэцэг өвчнийг бүрмөсөн устгасан. Халдварт саа өвчнийг 20 жилийн өмнө устгасан. Үүн шиг коронавирус өвчнийг ялахад ойрхон байна" гэлээ. 

А.Сүх