Коронавирусний вакциныг манай улс оруулж ирж, хүн амаа дархлаажуулахаар төлөвлөж байгаа. Дархлаажуулалтын талаарх мэдээллийг ХӨСҮТ-ийн Дархлаажуулалтын албаны дарга О.Дашпагма өглөө. Тэрбээр "Коронавирусний вакциныг хоёр тунгаар вакцинжуулна. Аливаа вакциныг товлолт хугацаанд нь хийлгэж байж үр дүн гардаг. Тиймээс дархлаажуулалтад хамрагдах иргэд хугацаандаа дараагийн тунгаа авах шаардлагатай.

Их Британи улсад хийсэн судалгаагаар "Астразенека" вакцин хийлгэсний дараа хэсэг газрын урвал илэрч байгаа мэдээлэл бүртгэгдсэн. Гэхдээ 1000 хүн тун тутамд 3-4 хүнд л илэрсэн. Энэ нь бусад вакцинтай адил байна гэж дүгнэгдсэн. Мөн толгой өвдөг бас бага зэрэг халуурах тохиолдол бүртгэгдсэн. Харин манай улсад энэ талаарх мэдээлэл бүртгэгдвэл бид дор бүр нь мэдээлэх болно. Вакцин хийлгэсний дараа дулаан хувцаслах, хариу урвал илрэх эсэхийг ажиглаж, хариу арга хэмжээ авах шаардлагатай. Коронавирусний вакцин тариулсны дараа архи, тамхи хэрэглэж болохгүй гэх заавар одоогоор байхгүй байна.

"Астразенека" вакциныг 0.5 мл тариураар хийдэг. Энэ тариур хангалттай байна. Бусад вакцины тариуруудыг захиалсан. Мутацад орсон вирусны эсрэг үйлчилнэ. Гэхдээ манай улсад ийм халдвар бүртгэгдээгүй байгаа.

Вакцинд харшлах эсрэг заалт байдаг. Тодруулбал аливаа нэг халдварт өвчинөөр өвчилсөн, халуурсан, мөн эсрэг заалттай иргэдэд вакциныг хийхгүй. Тиймээс иргэд вакцин тариулахаасаа өмнө эмчийн үзлэгт орж, тухайн эмчийн асуултад үнэн зөв хариулж, вакцинд хамрагдах эсэхээ шийдэх боломжтой.

Вакцины хамгаалах хугацаа гэж байдаг. Хувь хүний дархлаанаас хамаарч харилцан адилгүй, өөр өөр байдаг. Энэ вакцин нь шинэ учраас туршилтын ажил үргэлжилж байна. Хамгийн багадаа зургаан сарын хугацаанд эсрэг биет тогтооно гэсэн эхний ээлжийн мэдээлэл байгаа" гэлээ. 

Б.Баатар