Улс даяар хатуу хөл хорио тогтоосон энэ үед хуулийнхан бөөнөөрөө нэгнийдээ цугларч, архидан согтуурсан талаарх бичлэг нийтэд ил болж, олны анхааралд ороод байгаа билээ.

Энэ талаар ЦЕГ-ын Хэвлэл, мэдээллийн төвийн дарга, цагдаагийн дэд хурандаа Б.Баатархүү “Цагдаагийн байгууллагаас өнгөрсөн амралтын өдрүүдэд бичлэгтэй холбоотой асуудлаар шалгалтын ажиллагаа явууллаа. Мөн тэнд байсан хүмүүсийг дуудан мэдүүлэг авсан. Урьдчилсан байдлаар "биеэ үнэлэлт" байж болзошгүй эд мөрийн баримт олдсон тул хэрэг бүртгэлтийн ажиллагааг нээж, прокурорт хянуулахаар шилжүүлсэн” гэлээ.

Хэрэг бүртгэлийн ажиллагааг явуулснаар дээрх хүмүүсийг Эрүүгийн хуулийн 12.6.1 заалтыг зөрчсөн хэмээн үзэж, цаашид эрүүгийн хэрэг үүсгэн шалгах саналаа прокурорт хүргүүлсэн байна. Эрүүгийн хуулийн   тусгай ангийн  дээрх заалтад “Бусдыг биеэ үнэлэхэд зуучилсан, татан оролцуулсан бол зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ” хэмээн заажээ.

У.Тэргэл