Бичлэгт дурдагдсан шүүгчид болон хохирогч эмэгтэйчүүдийн өмгөөлөгч нар мэдээлэл хийлээ.

Энэ үеэр өмгөөлөгч Д.Баттулга "2021 оны хоёрдугаар сарын 20-ны өдөр цахим орчинд Баянзүрх дүүрэгт байрлах нэгэн байрны орцны бичлэг цацагдсан. Тухайн бичлэгт нэр бүхий шүүгчид, төрийн байгууллагын эрх бүхий албан тушаалтнууд болон бусад хүмүүс бичигдсэн байдаг. Тус бичлэг гарсан хүмүүсийг прокурорын зөвшөөрөлгүйгээр тагнасан, дагасан, мөрдсөн байж болзошгүй нөхцөл байдал үүссэн. Тухайн нөхцөл байдал нь Эрүүгийн хуулийн 21.13-т заасан гүйцэтгэх ажлын хууль тогтоомж зөрчсөн байж болзошгүй. Тиймээс  өмгөөлөгч нарын зүгээс Эрүүгийн хууль заасан гэмт хэргийг шалгуулахаар Тагнуулын ерөнхий газарт гомдол гаргаад байна.

Тэр бичлэгт дурдагдсан эмэгтэйчүүд хууль зүйн туслалцаа авахаар өмгөөлөгчид хандсан. Тэдний өмгөөлөгч нарын өгч байгаа мэдээллээр тухайн эмэгтэйчүүдийг цагдаагийн байгууллагын алба хаагчид маш олноороо амралтын өдөр, ажлын бус цагаар гэрээс нь баривчилж, 10 гаруй цаг тайлбар мэдүүлэг авсан байна. Ингэхдээ эрүү шүүлт тулгасан байж болзошгүй нөхцөл байдал үүсээд байгаа. Тиймээс НПГ, УЕПГ болон ЦЕГ-ын Тусгай субьектыг мөрдөн шалгах хэлтэст гомдол гаргаад байна" гэлээ. 

Өмгөлөөгч нарын мэдээлж буйгаар бичлэгт нэр нь дурдагдаж байгаа иргэдийн халдашгүй дархан эрхийг зөрчсөн гэж үзэж байгаа аж.

Б.Баатар