Нийслэлийн Боловсролын газрын дарга Ж. Гантулга цэцэрлэгийн  хүүхдүүдийн 80 хувь нь теле хичээлээ үзэж байгаа гэв. Харин эцэг, эхчүүд үүнийг доог тохуу гэж хүлээн авч, 80 бус харин 8 хувь гэвэл зөвшөөрье гэж байна.

Ерөнхий боловсролын сургуулийн сурагчдын цахим хичээлтэй давхцан цэцэрлэгийн насныхан теле хичээл үзээд суух боломж хомс. Тэгээд ч сурагчдын 20 хувь нь гэртээ зурагтгүй, компьютергүй, цахилгааны эх үүсвэргүй алслагдсан сум суурин газарт амьдарч буй хүүхдүүд гэдгийг салбарынх нь сайд хэлж байсан. Гэтэл сурагчидтай эн зэрэгцээд цэцэрлэгийн насныхан теле хичээлээ үзээд суух уу.

Нийслэлийн Боловсролын газрынхан цэцэрлэгийн хүүхдүүдийн эцэг, эхээс судалгаа авч, “Хүүхэд тань теле хичээлээ үзэж байгаа юу” гэдэг асуултад нөгөөдүүл нь “Тийм” л гэж хариулах нь тодорхой. Харин нийслэлийн Боловсролын газрын дарга бодит амьдралаас хол зөрүүтэй судалгааны дүнг үндэслэн ийнхүү мэдээлсэн бололтой.  

У.Тэргэл