2021 оны хоёрдугаар сарын 20-ны өдөр цахим орчинд Баянзүрх дүүрэгт байрлах нэгэн байрны орцны бичлэгийг цацсан. Тухайн бичлэгт нэр бүхий шүүгчид, төрийн байгууллагын эрх бүхий албан тушаалтнуудын дүрс  үлдсэн байдаг.

Тус бичлэгт гарсан Авлигатай тэмцэх газрын Аюулгүй байдал, дотоод хяналт шалгалт хариуцсан нэгжээс ажилтан, комиссар П.Чулуунбаатарыг ажлаас нь чөлөөлөөд байгаа бол Сүхбаатар дүүргийн Эрүүгийн хэргийн анхан шатны шүүхийн шүүгч Х.Идэр, З.Болдбаатар нар ажлаа хийсээр байгаа талаар бид мэдээлсэн билээ. Тэгвэл эдгээр шүүгчид бичлэгийг цацсанаас хойш ямар хэргийг шүүж, шийдвэрлэсэн талаарх мэдээллийг хүргэж байна.

Шүүх хуралдааны явцыг мэдээлэх цахим системийн мэдээллээс харахад, Сүхбаатар дүүргийн Эрүүгийн хэргийн анхан шатны шүүхийн шүүгч З.Болдбаатар нь энэ сарын 24-ний өдөр шүүгдэгч Д.Отгонням, шүүгдэгч Д.Цэрэндорж нарт холбогдох хэргийг шийдвэрлэсэн байна. Харин шүүгч Х.Идэр нь шүүгдэгч О.Эрдэмбилэг, шүүгдэгч, Ж.Баярсайхан, шүүгдэгч Г.Амартүвшин нарт холбогдох гурван хэргийн шүүх хуралдаанд оролцож, хоёр хэргийг шийдвэрлэж, нэг хэргийг нь прокурорт буцаасан гэх мэдээлэл байна. Харин энэ сарын 24-ний өдөр товлосон шүүгдэгч Э.Энхтүшигт холбогдох хэргийг шүүх хуралд орсон эсэх талаарх мэдээлэл байхгүй байгаа юм. 

Ямартай ч ёс зүйн алдаа гаргасан гэгдэж буй шүүгч нар бичлэг задарснаас хойш доорх хэргийн шүүх хурлуудад оролцон алх “цохьжээ”.  

Б.Баатар