БНЭУ-ын Засгийн газраас Монгол Улсад буцалтгүй тусламжаар 150 мянган тун буюу 75000 хүнийг дархлаажуулах вакцин энэ долоо хоногт орж ирсэн. Их Британийн эм үйлдвэрлэгч АстраЗенека болон Оксфордын их сургуулийн хамтран гаргаж авсан вакциныг ДЭМБ коронавирусний эсрэг эмчилгээнд яаралтайгаар ашиглах вакцины жагсаалт оруулж, энэ сард бүртгэсэн билээ.

Манай улс дөрвөн төрлийн вакцинаар иргэдийнхээ 60 хувийг дархлаажуулах бөгөөд үүний 20 хувь нь тусламжаар ирэх бол үлдсэнг нь худалдаж авахаар зохицуулсан. Засгийн газраас вакцинжуулалтыг үе шаттай явуулж, ирэх долдугаар сар гэхэд иргэдээ бүрэн хамруулж дуусгах зорилго тавиад буй.

Вакциныг эхний ээлжинд эрүүл мэндийн салбарын 50 мянга гаруй ажилтанд хийх бөгөөд Ерөнхий сайд болон Эрүүл мэндийн сайд иргэдээ дархлаажуулалтад уриалах зорилгоор эхний болон дараагийн тунг хийлгэсэн юм.

Тусламжаар орж ирээд буй АстраЗенека вакцин 95 хувийн хамгаалалт үүсгэж байгаа нь гурав дахь туршилтаар батлагдсан. Эрдэмтэд вакциныг 8-12 долоо хоногийн зайтай хийлгэх нь үр дүнтэй гэж зөвлөж буй. Вакцины нэг тун нь 3-5 ам.доллараар худалдаалагдаж байгаа бөгөөд ердийн хөргүүрт хадгалж, тээвэрлэх боломжтой. Харин коронавирусаар өвчлөөд эдгэсэн иргэдийн хувьд зургаан сарын дараа дархлаажуулалтад хамрагдана. Вакцин тариулснаар загатнах, булчин хавдах, дотор муухайрах, халуурах зэрэг шинж тэмдэг илэрч магадгүй. Харин 48 цагаас дээш хугацаагаар халуурвал эмчид хандахыг зөвлөжээ. 

А.Сүх