МИАТ компани маргаашаас эхлэн тусгай үүргийн нислэгээр ирэх иргэдийн тийзийн үнийг 15 хувиар хөнгөлөхөөр шийдвэрлэсэн. Үүнтэй холбоотой зарим асуудлаар МИАТ-ын ХЗ-ийн КОММЕР-ийн эрхэлсэн захирал Я.Өлзийболдоос зарим зүйлийг тодрууллаа.

-Цар тахлын үед МИАТ компани тодорхой чиглэл рүү нислэг үйлдэж байж тийзийнхээ үнийг нэмсэн хэмээн иргэд шүүмжлэлтэй хандаж байсан. Дээрх хөнгөлөлт нь бодитой дэмжлэг биш гэж үзэх иргэд олон байна?

-Тусгай үүргийн нислэг ялгаатай нөхцөл байдалд үйлдэж байгааг иргэд мэдэж байгаа. Тусгай үүргийн нислэг болон энгийн хуваарьт нислэг тэнгэр газар шиг зөрүүтэй шүү дээ. Учир нь нэг агаарын хөлөгт оногдох нислэгийн цаг гэж бий. Жишээлбэл, жилд 3000 цаг нисдэг байсан онгоцны цаг багасч байна. Сард 50 удаа нислэг үйлддэн байсан онгоц 300 мянган ам.долларын түрээс төлдөг гэж бодъё. Үүнийгээ 50 нислэгт хуваавал нэг нислэгт оногдох хэмжээ нь 6000 ам.доллар гэсэн үг. Гэтэл одоо 50 биш сард 5 удаа нисэж байгаа учраас зардал нь нэмэгдсэн. Тиймээс хуваарьт нислэгийн үнийг тусгай үүргийн нислэгийн үнэтэй харьцуулах ямар ч боломжгүй. Хилээ хаачихсан байгаа улсуудад ч ялгаагүй ийм л байгаа.

-Тэгвэл нөхцөл байдал хэвийн хэмжээнд хүрэх үед тийзийн үнэ өмнөх үнэ шигээ болж чадах уу?

-Тэгнэ. Дэлхийн хэмжээнд хийсэн судалгаагаар нислэг 2023, 2024 оноос нааш өмнөх түвшиндээ хүрч чадахгүй гэж үзсэн. Тиймээс хилээ нээнгүүтээ л нислэг сэргэчихнэ гэж ойлгож болохгүй. Бага багаар л түвшин нь нэмэгдээд явна гэсэн үг.

-МИАТ компанийн алдагдал 58 тэрбум төгрөгт хүрч магадгүй гэсэн урьдчилсан тооцоо гарсан байна. Энэ алдагдлаа хэрхэн нөхөх вэ. Дээр нь тусгай үүргийн нислэгүүдээ 15 хувиар хөнгөлөхөөр боллоо. Цаашид тийзийн үнээ хэвийн хэмжээнд хадгалж чадах уу?

-Нислэгүүдээ ирэх долдугаар сараас эсвэл арай өмнө нээчих болов уу гэсэн хүлээлт бий. Энэ нь вакцинжуулалтын арга хэмжээ, улс оруудын хязгаарлаж байгаа арга хэмжээнээс хамаарна. Хуваарьт нислэг их, бага хэмжээгээр сэргэвэл нэгж нислэгт оногдох зардал хэмжээ буурч тийзийнхээ үнийг тодорхой түвшинд бариад явах боломжтой болно.

Б.Лхам