“Төлбөрийн хэмжээ, төлбөрийн арга, журам батлах тухай” тогтоолыг өнөөдрөөс хэрэгжүүлж эхэллээ. Үүнтэй холбоотойгоор Эрүүл мэндийн даатгалын ерөнхий газрын Бодлого, төлөвлөлтийн хэлтсийн дарга Б.Батчимэг мэдээлэл өгч, иргэдийн сонирхсон асуултад хариуллаа.

-Гуравдугаар сарын 1-нээс буюу өнөөдрөөс хорт хавдрын хими эмчилгээ, томоохон хагалгаанууд үнэ төлбөргүй болж, иргэд харьяалал харгалзахгүйгээр өөрсдөө эмнэлгээ сонгохоор болж байгаа.  Энэ талаар болон бусад хэрэгжүүлж эхэлж буй шийдвэрээс танилцуулахгүй юү?

-Хорт хавдартай хүн химийн эмчилгээний хамтын төлбөрийг 2021 оны гуравдугаар сарын 1-нээс эхэлж төлөхгүй болж байгаа юм.  Хамтын төлбөрийн тухайд өвчтөний төлбөрийг иргэн, даатгал хэдийг төлөх вэ гэдгийг журамд шинэчлэн оруулсан. Нөгөөтэйгүүр, төр шимтгэлийг нь даахаар болсон учир групптэй, ахмад настан, хоригдол, хүүхдээ асарч байгаа зэрэг зорилтот бүлгийнхэн ор хоногийн мөнгө төлөхгүй болсон. Мөн өндөр өртөгтэй оношилгоо шинжилгээний багцыг тусгайлан баталж өгсөн. Энэхүү багц нь өртөг өндөртэй оношилгоо, шинжилгээ гэсэн хоёр хэсгээс бүрдэнэ. Ерөнхий шинжилгээгээр онош нь тодрох боломжгүй, нарийвчилсан шинжилгээг эмчийн заавраар хийхээр зохицуулсан. Өндөр өртөгтэй шинжилгээний жагсаалтыг Эрүүл мэндийн даатгалын газрын даргын тушаалаар батална. Шинжилгээний төлбөрийн 70 хувийг Эрүүл мэндийн даатгалын сан, 30 хувийг иргэн өөрөө хариуцна. Өндөр өртөгтэй оношилгооны багцад MRI, компьютер томографи, дурангийн оношилгоо, ажилбар, судсан дотуур хийх оношилгооны ажилбар, судасны бус ажилбар, цөмийн оношилгоо, зүрхний эхо, холтер зүрхний бичлэг, электромиографи зэрэг орсон. Өндөр өртөгтэй шинжилгээний багцад хамаарах шинжилгээний жагсаалтыг Эрүүл мэндийн даатгалын ерөнхий газрын даргын тушаалаар батлах бөгөөд Сангийн сайд, Эрүүл мэндийн сайдын хамтарсан тушаалаар баталсан “Төрийн болон орон нутгийн өмчит эрүүл мэндийн байгууллагаас үзүүлэх нэмэлт болон төлбөртэй тусламж, үйлчилгээний төлбөрийн жишиг хэмжээ”-г баримтлан эрүүл мэндийн даатгалын сангаас санхүүжүүлнэ. Мөн багцын зардлын бүрэлдэхүүнд эмчийн дүгнэлт, тухайн оношилгоо, шинжилгээг хийхэд шаардлагатай урвалж, бодис, лабораторийн зардал болон холбогдох шууд болон шууд бус зардал хамаарна. Өндөр өртөгтэй оношилгоо, шинжилгээг тухайн оношийн хүрээнд хийгдэх ерөнхий оношилгоо, шинжилгээгээр онош нь тодрох боломжгүй, нарийн оношилгоо хийлгэх зайлшгүй шаардлагатай тохиолдолд зөвхөн эмчийн заалтаар хийх зохицуулалттай..

-Хувийн эмнэлгээс үйлчилгээ авахад буцаан олголт авах боломжтой юу?

-Иргэд хувийн хэвшлийнхнээс тусламж үйлчилгээ авахдаа Эрүүл мэндийн даатгалын газартай гэрээ байгуулсан уу, үгүй юү гэдгийг судлах хэрэгтэй. Гэрээ хийсэн бол буцаан олголт авч болно. Хамгийн гол нь даатгуулагч эмнэлгээ зөв сонгох хэрэгтэй. Иргэд өнөөдрөөс хувийн эмнэлгийг амбулаторийн үзлэгийг Эрүүл мэндийн даатгалын газраас санхүүжүүлэх үү гэж маш их асууж байна. Тиймээс иргэн даатгуулагч тухайн хувийн эмнэлгийг гэрээгээ шинэчилсэн үү гэдгийг маш сайн асуух хэрэгтэй.

-Дурангийн хагалгааг Эрүүл мэндийн даатгалаар хөнгөлөх үү?

-Дурангийн хагалгааг хэд хэдэн төрлөөр хийж байгаа. Хэвтүүлэн эмчилгээ хийж байгаа тохиолдолд оношилгоо, эмчилгээ, хагалгааны төлбөр бүгд багтсан. Дурангаар хийх ажилбар мөн суусан. Дурангийн оношлогоог 60, дурангийн ажилбарыг 100 мянгаар санхүүжүүлнэ.   

-Жирэмсэн эхчүүд хувийн эмнэлэгт хяналтад орж болох уу?

-Болно. Хамгийн гол нь анхан шатны эрүүл мэндийн байгууллагадаа жирэмсний хяналтдаа ороод лавлагаа шатлалын хяналтыг энэ эмнэлэг дээр хийнэ гэдэг 13А маягтаар зохицуулна. Ингэхдээ иргэн эмнэлгээ сонгох эрхтэй.

У.Тэргэл