Монгол Улсад хүн худалдаалах гэмт хэргийн тоо сүүлийн жилүүдэд эрс нэмэгдэж, арга хэлбэр нь улам нарийсчээ. Тиймээс хүн худалдаалах гэмт хэрэг, бэлгийн мөлжлөгөжөс урьдчилан сэргийлэх зорилгоор “Мөрөөдлийн шүхэр” 21 хоногийн аянг “Хүйсийн тэгш эрх” төвөөс эхлүүлжээ. 

Хамгийн ноцтой нь, Монгол Улсын иргэдийг гадаадын 26 улсад худалдаалсан байна. Энэ дагуу холбогдох байгууллагууд болох ГХЯ, ХЗДХЯ, Тагнуулын ерөнхий газар хамтран гадаадын 16 улсаас хүний наймаанд өртсөн иргэдээ авчиржээ. Зөвхөн Малайзаас гэхэд л хүний наймааны хохирогч болсон 16 иргэнээ авчирсан ба нэг хүний зардал гэхэд л долоон сая төгрөг болдог байна. Тиймээс төр, засгаас  хохирогчийн эрхийг хамгаалах санд тодорхой төсвийг хуваарилж өгч байхыг  “Хүйсийн тэгш эрх”   төвөөс удаа дараа хүссэн ч одоогоор тодорхой хариу өгөөгүй байгаа  аж.

Хүний наймааны хэргийг дотоодод үйлдэх нь элбэг аж. Манай улсад гэхэд 13-18 насны охидыг зохион байгуулалттайгаар биеийг нь үнэлүүлж,  ашиг олдог бүлэглэлийг цагдаагийн байгууллага илрүүлэн шалгаж эхэлжээ. Хамгийн ноцтой нь, хүн худалдаалах гэмт хэрэгт өртөж байгаа гурван хүн тутмын нэг нь насанд хүрээгүй охид байдаг аж.

У.Тэргэл