Монгол Улсын Ерөнхий сайд Л.Оюун-Эрдэнэ "Эмэгтэйчүүдийн эрхийг хамгаалах өдөр" ШШГЕГ-ын харьяа Цагдан хорих 401 дүгээр ангийн эмнэлэгт ажиллаж, С.Зориг агсны амь насыг хөнөөсөн хэрэгт буруутгагдан ял эдэлж буй Т.Чимгээтэй уулзсан.

Энэ үеэр Ерөнхий сайд Л.Оюун-Эрдэнэ "Шүүн таслах үйл ажиллагаанд хүний эрх, хууль зөрчсөн зүйл, ТЕГ, ЦЕГ, АТГ, ШШГЕГ–тай холбоотой асуудал гарч ирнэ. Шүүн таслах үйл явц дунд олон зүйл болсон байна. 

Шүүхийн гэм буруугийн асуудлыг бус шүүн таслах үйл ажиллагаа зөв явсан эсэхийг ярьж байна. Хууль хяналтын хүн хар тамхи хэрэглүүлж, нүцгэн байсан зургийг нь гэр бүлийнхэнд нь явуулсан. Энэ бичлэгийг ил болгохгүй гэж үзсэн боловч Чимэгээ сая энэ бичлэгийг ил болгох нь зүйтэй гэж ярьлаа.

Засгийн газрын хуралдаанаар энэ асуудлыг хэлэлцэнэ. Мансууруулах бодис хэрэглүүлж, биеэ хянах боломжгүй байхад нь хурууных нь хээг хүртэл авсан байж болзошгүй байна. Зарим хэрэг шүүх дээр гацдаг, заримыг нь яагаад хурдан шийддэг юм бэ. Энэ асуудлыг бид гаргаж тавих нь зүйтэй гэж үзэж байна" гэдгийг хэлсэн байдаг. 

Харин Т.Чимэгээ "2015 оны наймдугаар сарын 31-нд Төв аймгийн цагдан хориход хоригдсон. Тэнд гурван сарын хугацаанд ариун цэврийн хэрэгсэл байхгүй, усанд орж болохгүй, хоол ундны асуудал хүнд, дотроо өтгөн шингэнээ гаргадаг хүнд нөхцөлд байсан.

Агааржуулагч байхгүй ийм газар есөн сар хорьсон.

Дараа нь хорих 407 дугаар анги руу 2017 оны тавдугаар сард шилжсэн. Нөхцөл байдал дээрдээгүй. Дарамт шахалтад долоон сар хоригдсон. Одоо 401 дүгээр ангид хоригдож байна. Энд орчин нөхцөл өөрчлөгдөж, эмнэлэгт хэвтэн эмчлүүлж байгаа. Миний амьдралын таван жилийг эрүүл мэнд, сэтгэл санаа, үр хүүхдээр минь хохироолоо. Тарчлаан зовоож, тамлаж, хар дарсан зүүд шиг таван жил болж байна. Намайг хилсээр хоригдоод нэг жил болоход миний том хүүхэд автомашины осолд орсон гэж амь насаа алдсан. Энэ хэргийг дахин шалгуулах хүсэлтэй байгаа" гэсэн юм. 

Тэгвэл С.Зориг агсны хэрэгт сэжигтнээр шалгагдаж байсан Хотын дарга асан Э.Бат-Үүл дээрх үйл явдалтай холбоотойгоор өөрийн байр сууриа илэрхийлжээ.

Тэрбээр цахим хуудсаараа дамжуулан энэ талаар "Ерөнхий сайд Л.Оюун-Эрдэнэ, С.Зоригийн амь насыг хөнөөсөн хэрэгт буруутгагдан ял эдэлж буй Т.Чимгээ нарын хэлж буй зүйлс үнэн бол, дахин хэлэхэд үнэн бол! Монголын хуулийн инститүүц (ТЕГ, ЦЕГ, АТГ, ШШГЕГ, Прокурор, Шүүх) нь мафийн террор байгууллага байж. Азаар цаазын ялгүй Улс болжээ" хэмээн мэдээлсэн байна. 

Б.Баатар