Сүүлийн хэд хоногт коронавирусний халдварын тохиолдол эрс нэмэгдсэн тул иргэд вакцинжуулалтыг эрчимжүүлэхийг төр, засгаас шаардаж буй.

Үүнд, хувийн хэвшлийнхний оролцоо ч чухал юм. Тиймдээ ч Худалдаа хөгжлийн банк, “Монос” групп вакцин оруулж ирэхээ мэдэгдэн, зөвшөөрөл хүлээж байгаагаа хэлсэн.  Харин УОК-оос вакцинжуулалтыг эрчимжүүлэхийн тулд хувийн хэвшлүүдэд АстраЗенека зэрэг вакцин оруулж ирэх зөвшөөрлийг олгосон байна. Зарим нь  эхнээсээ оруулж ирснийг Засгийн газрын хэвлэл мэдээллийн газрын дарга Ц.Ганзориг хэлж байна.

Тэрбээр “Хатуу хөл хорио тогтоохгүй. Гуравдугаар сарын 9-ний өдрөөс Улаанбаатар хотын 15-20 мянган иргэнийг өдөр бүр вакцинжуулна. Худалдаа, үйлчилгээний салбар, бүх шатны боловсролын салбарын багш, ажилчдыг ирэх долоо хоног гэхэд хамруулж, бусад насныхан сайн дураараа АстраЗенека, Спутник, Синовак хийлгэж болно” хэмээн мэдэгдлээ.

Мөн “Монос”-т вакцин оруулж ирэх зөвшөөрөл өгсөн. “Монос” энэ сард 65 мянган тун АстраЗенека вакцин оруулж ирэх тухайгаа сүүлд уулзахдаа хэлсэн. Цаашид ч оруулж ирэх төлөвлөгөөтэй байгаа юм билээ. Мон эм импекс, Интермэд зэрэг хувийн хэвшлүүд эхнээсээ вакцин оруулж ирсэн” гэлээ.

У.Тэргэл