Улсын онцгой комисс 2021 оны гуравдугаар сарын 08-ны өдрийн хуралдаанаар Улаанбаатараас орон нутаг явж байгаа иргэдийг тухайн аймгийн Онцгой комисс халдварын нөхцөл байдал, эрсдэлийн тооцоо, судалгаанд үндэслэж хүлээж авах эсэх шийдвэрээ гаргах тухай үүрэг, чиглэл болгосонтой холбогдуулан өнөөдөр Өвөрхангай аймгийн Онцгой комиссын Шуурхай штаб цаг үеийн асуудлаар хуралджээ.

Сүүлийн өдрүүдэд Улаанбаатар хотод халдвар авсан иргэдийн тоо нэмэгдэж, зарим аймгуудад шинээр өвчлөл бүртгэгдэж, голомттой бүсээс /Улаанбаатар хот/ эрүүл, ногоон бүсэд халдвар тархах эрсдэл өндөр байгаа тул энэ сарын 11-ний өдрөөс эхлэн Улаанбаатар хотоос ирэх, явах хөдөлгөөнийг хязгаарлахаар төлөвлөж энэ хүрээнд холбогдох тооцоолол судалгааг хийж, эрсдэлийг үнэлж, бэлтгэл ажил хангахыг мэргэжлийн байгууллагуудад үүрэг болголоо.