“Яармагийн 300 орт” гэдгээр нь иргэд мэддэг нэгдсэн эмнэлэг нь 500 өвчтөн хүлээн авах хүчин чадалтай. Харин өнөөдрийн байдлаар тус эмнэлэг коронавирусний халдвар аван эмчлүүлж буй өвчтөнөөр дүүрчээ. Дийлэнх нь халдвартай иргэний нэг,хоёрдугаар хавьтал бөгөөд хамт олноороо хэвтэх нь элбэг байгаа аж. Өнөөдрийн ЭМЯ-ны мэдээллээр, хэвтэн эмчлүүлж буй 697 хүн байгаа хэмээсэн. Тэгвэл тэдний дийлэнх буюу 300 орчим нь тус эмнэлэгт эмчлүүлж байна гэсэн үг аж.

Хамгийн гол нь, хэвтэн эмчлүүлэгчид эмчилгээнд нь эргэлзэж эхэлжээ. Өвчтөнүүдэд өдөрт дархлаа дэмжих танг хоёр удаа,4000 мр Д, 1000 мр С витаминыг шахмалаар нэг удаа өгдөг. Өөр тусгайлсан эмчилгээгүйгээр өдрийг өнгөрөөж байгаагаа тэд хэлж байна. Цаашлаад тэднийг 10 хоног эмнэлэгт эмчлээд гаргаж байгаа ба энэ хугацаанд халдварын эрсдэл үгүй болсон уу, хэдий хугацааны дараа вакцинжуулалтад хамрагдаж болох вэ, эмнэлгээс гарсны дараа гэрийн тусгаарлалтад 14 хононо. Үүний дараа нийгмийн амьдралд шууд оролцоход халдвар тараах эрсдэлгүй биз дээ гэх олон асуултад хариулт нэхжээ. Харамсалтай нь,энэ асуултад товч,тодорхой хариулт өгчих хүн байхгүй байгаа нь өвчтөнүүдийг бухимдуулж эхэлжээ.

Мөн тус эмнэлэгт өчигдөр ирсэн нэгэн залуу өнөөдрөөс өлсгөлөн зарлахаа мэдэгджээ. Тэрбээр харьяа дүүргийнхээ шинжилгээний цэгт коронавирусний шинжилгээ өгсөн аж. Гэтэл цагдаагийн байгууллагаас утасдаад “Таны шинжилгээний хариу эерэг гарсан. Удахгүй эмнэлэг рүү авч явна” хэмээжээ. Гэтэл нөгөөх залуу хариуд нь эргэлзэнгүүтээ тэр дороо хувийн томоохон эмнэлэгт очин шинжилгээ өгтөл сөрөг гарчээ. Энэ тухай холбогдох хүмүүст нь хэлэхэд тэд үл ойшоон Яармагийн 300 ортой эмнэлэгт албадан авчирсан байна. Тиймээс өлсгөлөн зарлахаа мэдэгдэн, улсаас авч буй PCR шинжилгээний хариуд итгэхгүй байгаагаа хэлж, энэ талаарх гомдлоо ЭМЯ, УОК-т тавихаа хэлж буй аж.

Энэ мэт шинжилгээ, эмчилгээтэй холбоотой иргэдийн гомдол  тасрахгүй үргэлжилсээр. Холбогдох хүмүүс нь ч үүнд анхаарлаа онцгойлон хандуулаасай билээ.

У.Тэргэл