Эрүүл мэндийн яам коронавирусний талаарх ээлжит мэдээллээ хийж байна. 

Сүүлийн 24 цагийн хугацаанд буюу 2021 оны гуравдугаар сарын 12-ны өдөр нийт 19319 хүнд ПСР шинжилгээ хийхэд 169 хүнээс халдвар илэрсэн байна. Эдгээр нь Улаанбаатар хотод  бүртгэгджээ. 156 хүн нь ойрын хавьтлаас илэрчээ. 11 хүний халдварын эх үүсвэрийг тогтоохоор ажиллаж байгаа аж. 

Монгол Улсад нийт батлагдсан тохиолдол 3833 боллоо. Харин 48 хүн эдгэрч эмнэлгээс гарч, нийт эдгэрсэн хүний тоо 2955 болсон байна. Өнөөдрийн байдлаар нийт 811 хүн эмчлүүлж байна. Тэднээс 2 хүний биеийн байдал маш хүнд болон хүнд байна.

ХӨСҮТ-ийн дэд захирал Э.Тэмүүлэн "Сүүлийн үед халдвар ихээр бүртгэгдэж, эх уурхай нь тодорхойгүй халдвар бүртгэгдсээр байгаа учраас бид УОК-т хөл хорио тогтоох, үйлчилгээний байгууллагуудын цагийн хуваарийг багасгах, хүн олноор цуглардаг үйл ажиллагааг зохион байгуулахгүй байх, караоке, баарны үйл ажиллагааг зогсоох зэрэг хэд хэдэн саналыг хүргүүлсэн байгаа. УОК ямар ч шийдвэр гаргасан байсан иргэд та бүхэн халдвар хамгааллын дэглэмээ баримталж, амны хаалтаа давхарлан зүүх, гараа халдваргүйжүүлэх, олон хүнтэй газраар явахгүй байх зэргээр өөрийгөө болон хайртай дотны хүмүүсээ хамгаалаарай хэмээн хичээнгүйлэн хүсч байна" гэв.

Р.Алтан