Дархлаажуулалтын талаар ХӨСҮТ-ийн Дархлаажуулалтын албаны дарга О.Дашпагма мэдээлэл өглөө.

Тэрбээр "Гуравдугаар сарын 12-ны өдрийн байдлаар нийслэлд 44 цэгт 97 баг ажиллаж 600 гаруй хүнийг бүрэлдэхүүнтэйгээр 16540 хүнийг вакцинжуулсан.  Ингээд нийт вакцинд хамрагдсан хүний тоо 84017 болж байгаа юм. Эдгээр хүмүүс нь коронавирусний эхний тунг авсан гэсэн үг. Бид эхний ээлжинд 12 хувийг хамруулах хэмжээний вакциныг хүлээн аваад байгаа. Тиймээс коронавирусний халдварт өртөх эрсдэлтэй болон хүндрэх магадлалтай хүмүүсээ эхний ээлжинд хамруулж байгаа. Ирэх долоо хоногт 60-64 насныханг хамруулахаар төлөвлөж байгаа. Харин энэ амралтын өдрүүдэд 44 гаруй цэгт мөн вакцинжуулалт хийнэ. Вакцинжуулалтын ажил хэвийн явагдаж байна" гэлээ.

Мөн тэрбээр "Коронавирусний вакцинд хамрагдсан хүмүүст илэрч байгаа хариу урвалыг байнга бүртгэж, хянаж байгаа. Нийт вакцин хийлгэсэн хүний 44,8 хувьд халуурах шинж тэмдэг илэрч байна. Хэрэв шинж тэмдэг удаан хугацаанд илэрээд байвал тухайн эрүүл мэндийн байгууллагадаа хандах хэрэгтэй. Гэхдээ шинж тэмдэг 2-3 хоног л үргэлжилнэ" гэдгийг онцоллоо.   

Б.Баатар