Улсын Онцгой комиссын шийдвэрээр гуравдугаар сарын 15-ны өдрөөс шар буюу хоёрдугаар түвшнээс улбар шар буюу гуравдугаар түвшинд шилжүүлж байна.

Ингэснээр дараах газруудын үйл ажиллагааг 14 хоногийн хугацаанд хязгаарлахаар болсон. 

Тодруулбал, жагсаал, цуглаан, уралдаан тэмцээн, аялал, зугаалга, баар, диско, караоке, өргөтгөсөн болон үзэсгэлэн худалдаа, цахим болон бүх төрлийн тоглоомын газар, сургалтын төв /танхимын болон үйлдвэрлэлийн сургалт 10-аас дээш хүнтэй/, соёл урлаг, үзвэр үйлчилгээ /нийт суудлын тооны 30 хувиас их/, алжаал тайлах төв, чийрэгжүүлэх, бялдаржуулах төв /нийт 30 хувиас их/, саун, бассейн /нийт хүчин чадлын 30 хувиас их/, дэн буудал, шашны зан үйл, гандан, сүм хийд, мөргөлийн газрууд, олимп, олон улсын тэмцээний бэлтгэлээс бусад биеийн тамир, спортын арга хэмжээ /дотоод орчинд 10-аас дээш хүнтэй/-г зохион байгуулахыг хориглосон билээ. 

Мөн хот хоорондын зорчих хөдөлгөөнийг ирэх даваа гарагаас буюу гуравдугаар сарын 15-ны өдрөөс мөн 14 хоног хязгаарлахаар болжээ. Түүнчлэн үйлдвэр үйлчилгээний газруудын ажиллах цагийн хуваарийг 22 цаг болгох шийдвэр гаргасан байна. Мөн 23 цагаас өглөөний 06 цаг хүртэл хөл хөдөлгөөнийг хязгаарлана гэдгийг Улсын Онцгой комиссоос мэдээлсэн. 

 

Энэ талаар талаар Шадар сайд С.Амарсайхан "Хатуу хөл хорио тогтоохгүйгээр зарим арга хэмжээг хэрэгжүүлэхээр боллоо. Мэргэжлийн байгууллагын шнэлгээнд үндэслэн шар буюу хоёрдугаар түвшнээс улбар шар буюу гуравдугаар түвшинд шилжүүлж байна. Хэрэв энэ хугацаанд халдвар хамгааллын дэглэмээ баримталж ажиллавал эргээд хэвийн амьдрал руу шилжих болно" гэдгийг хэлсэн юм. 

Б.Баатар