Сүүлийн өдрүүдэд коронавирусний халдварын тохиолдол өдөрт 100-гаас буурахгүй байгаа энэ үед вакцинжуулалт хамгийн чухал болоод байна. Төр, засаг боломжийн хэрээр бүхий л арга хэмжээг авч байгаа ч дэлхий нийтийг түгшээгээд байгаа цар тахалтай анх удаа нүүр тулж байгаа тул алдаж, онох нь бий. Харин энэ үед тулж, дэмжиж, төр, засгийн нуруунаас ачааллыг нь бага ч болов үүрэлцэх нь хувийн хэвшлийнхэн.

Тоног төхөөрөмж, хангамж, ажиллах боловсон хүчнээрээ ямагт илүүрхэж байдаг хувийн хэвшлийн томоохон эмнэлгүүд энэ хүнд цагт ачааг үүрэлцэх нь бүү хэл харин ч ашиг хонжоо олохыг илүүд үзэх болжээ.

Манайдаа томоохонд тооцогддог “Интермэд” эмнэлэгт ажилтнуудаа вакцинжуулалтад хамруулахаар нэгэн захирал хандтал “тэнгэрийн үнэ” хэлээд сууж байх жишээтэй. Тухайлбал, ОХУ-ын “Спутник-V” вакцины хоёр тун нь 240 мянган төгрөг. Дээр нь PCR шинжилгээ, эсрэг биетийн шинжилгээ, анхны үзлэг гээд нийтдээ нэг хүний 450 мянган төгрөг гэжээ. “Спутник-V” вакциныг ОХУ-ын тал нэг тунг 10 ам.доллар, хоёр тун нийлээд 20 ам.доллар буюу барагцаагаар монгол төгрөгөөр 60 орчим мянган төгрөг болдог.

Мэдээж, тээвэрлэлт, хадгалалтын гээд зардлыг нэмэх нь тодорхой. Тэглээ гээд дөрөв дахин нугалдаг бизнес энэ аж. Нэг хүнд вакцин хийлгэхэд 450 мянган төгрөг. Энэ хэмжээний мөнгийг төлөх байгууллага, хувь хүн хэр олон билээ.

Хувийн хэвшил юм тариулбал тариул, үгүй бол гэж суух нь тэдний эрх. Гэлээ ч цар тахлын энэ үед нэг ч гэсэн монгол хүнээ дархлаажуулж, нийгмийн хариуцлагаа бага ч болов ухамсарлабал сайхан цаг ирэхэд нүүр бардам суухсан.

Ийм сэтгэлгээ, сэтгэл даанч үгүй бололтой. Гэхдээ “MCS”, “Тавантолгой түлш”, “Эрдэнэт үйлдвэр” гээд олон байгууллага нийгмийн хариуцлагаа ухамсарлан ажилчдаа өөрсдийн хөрөнгөөр вакцинжуулалтад хамруулж эхэлсэнд талархах учиртай. Иргэн эрүүл бол улс баян гэдэг дээ.

У.Тэргэл