УИХ-ын гишүүн Ц.Мөнхцэцэг, Г.Амартүвшин нар С.Зориг агсны амь насыг бүрэлгэсэн хэрэгт буруутгагдан ял эдлэж буй Т.Чимгээг эрүүдэн шүүсэн асуудлаар нийтийн сонсгол хийх хүсэлт гаргаад буй. Тэгвэл тэд өнөөдөр ХЭҮК дээр очиж, хүний эрхийн асуудлаар болон иргэн Т.Чимгээг эрүүдэн шүүсэн асуудлаар ямар байр суурьтай байгаа, ямар ажил хийж хэрэгжүүлж байгаа талаар санал солилцов. 

ХЭҮК-ийн гишүүн Б.Энхболд "Монгол Улс хүнийг эрүүдэн шүүхийн эсрэг конивенцид 2001 онд элсэн орсон. Үүний хүрээнд эрүүдэн шүүхийн эсрэг хуулийг 2002 онд батлуулсан. Гэтэл Монгол Улсад эрүү шүүлттэй холбоотой асуудал байсаар ирсэн. Тиймээс энэ байдлыг засч залруулах ёстой гэдгийг ХЭҮК илтгэлээрээ удаа дараа мэдэгдэж, зөвлөмжийг өгч байсан. Бид эрүү шүүлттэй санал нийлэхгүй. Т.Чимгээгийн асуудлыг зөвтгөхгүй байгаа. Тиймээс ч ямар байдлаар ажиллах нь зөв талаар судалж, холбогдох байгууллагуудтай хамтран ажиллаж байна.   

Иргэн Т.Чимгээтэй холбоотой гомдол өмнө нь манай дээр ирж байсан юм билээ. Харин шинэ гишүүд томилогдсоноос хойш Т.Чимгээгээс өөрөөс нь гомдол ирээгүй. Хадам ээж болон гэр бүлийн хүмүүс нь ирж уулзаж, хүсэлт гаргасан.

Тус хүсэлтэд, цар тахалтай холбоотойгоор Т.Чимгээтэй холбоо тасраад байна. Биеийн байдал болоод сэтгэл зүй нь ямар байгааг мэдэж өгөхийг хүссэн. Тиймээс ХЭҮК-ын ажлын хэсэг гуравдугаар сарын 5-ны өдөр 401 дүгээр хорих ангийн эмнэлэгт очиж, Т.Чимгээ болон Б.Содномдаржаа нартай уулзсан. Энэ үеэр тэд эмнэлгийн үйлчилгээ авч байгаагаа хэлээд өөрт холбогдох хэргийг хурдан шийдвэрлэж өгөхийг хүссэн. ХЭҮК тэдний хүсэлтийг Улсын Дээд шүүхэд уламжилсан. Хууль хяналтын байгууллагаар шалгагдаж байгаа хэрэгт ХЭҮК акц тавих боломжгүй, үүнийг хориглосон байдаг учир бид үүнд оролцох боломжгүй" гэлээ. 

УИХ-ын гишүүн Ц.Мөнхцэцэг "Олон нийтэд ил болсон тодорхой иргэнийг эрүүдэн шүүсэн хэрэг нь Т.Чимгээгийн асуудал байгаа. Монгол Улсад аливаа хүнийг эрүүдэн шүүхийг хориглосон. ХЭҮК Т.Чимгээг эрүүдэн шүүсэн асуудлаар байр сууриа илэрхийлж, зөвлөмж гаргах эрхтэй. Хуулиараа танай байгууллага хүний эрхийн асуудлаар санал зөвлөмж гаргах эрхтэй учир та бүхэн үүнд анхаарал хандуулах хэрэгтэй. Т.Чимгээ нарыг эрүүдэн шүүсэн бичлэг ил болоод хоёр жил болж байхад ХЭҮК ямар ажил хийсэн бэ. Одоо үүнд анхаарал хандуулж идэвхтэй ажиллах хэрэгтэй" гэдгийг онцоллоо.   

Б.Баатар