ХҮН-ын гишүүн, “Бид уучлахгүй” хөдөлгөөний тэргүүн Б.Мөнхцэлмэг АТГ-ын үүдэнд мэдээлэл хийлээ. Тэрбээр өнгөрсөн хоёрдугаар сарын 25-ны өдөр оффшор бүсэд данс эзэмшдэг 18 иргэнийг шалгуулах хүсэлтийг АТГ-т гаргасан. Энэ талаар түүнтэй ярилцлаа.

-Таны өнөөдөр мэдээлэл хийж буй зорилго юу вэ.  Та өмнө нь оффшор данстай улстөрч, иргэдийг шалгуулахаар АТГ-т хандсан. Хариугаа авсан юм уу?

-Би дөнгөж сая АТГ-т ороод гараад ирлээ. Энэ талаар удахгүй дэлгэрэнгүй яръя. Харин одоо нийгэмд болж байгаа нөхцөл байдлыг хэлье. Улс төрийн сонгууль дөхөж,  МАН, АН-ынхны сандал, суудлын төлөөх зодоон эхэлж байна. Тэд дахиад сайн зодолдоосой. Яагаад гэвэл хуулийн байгууллагууд сүүлийн 20 жилд ажиллаад, мөрдөөд ил гаргаж ирж чадаагүй ноцтой баримтууд сонгуулийн өмнө ил болдог.  УИХ, Ерөнхийлөгчийн сонгууль дөхөхөөр бичлэг гарч ирдэг. Хоёрдахь нь өмгөөлөгч Б.Баасанцогт 11 шүүгчийн данс руу мөнгө шилжүүлсэн ноцтой баримт ил боллоо. Энэ том хулгайчдын зодоон дунд энэ бүхэн ил болж байгаа нь сайн талтай  юм. Шударга ёсыг тогтоох үүрэгтэй шүүгчид өнөөдөр авлига аваад сууж байна. Гэтэл жирийн иргэн нэг удаа л хазгай гишгэхэд шоронд ордог. Манай ХҮН-ыг орон нутгийн сонгуульд оролцуулахгүй байх шийдвэрийг ганцхан хүний алх тогшилтоор шийдэж байсан. Өнөөдөр УИХ, Ерөнхийлөгчийн сонгуульд нэр дэвшигчид гуравхан зүйлийг улиг болтол ярьдаг.  Авлигатай тэмцэнэ, шударга ёсыг тогтооно, оффшороос мөнгө оруулж ирнэ гэж. Харин сонгууль дуусдаг, маргааш нь хэн ч энэ асуудлын талаар сөхөж ярьдаггүй.

-Цаашид ямар арга хэмжээ авах вэ. Оффшорт данстай эрхмүүдийг АТГ шалгахад тодорхой хугацаа заасан байдаг. Энэ хугацаа дуусч байгаа биз дээ?

 -Бидний хувьд өнгөрсөн хоёрдугаар сарын 25-нд Монгол Улсын Ерөнхийлөгч Х.Баттулга, УИХ-ын гишүүн Сү.Батболд, Б.Дэлгэрсайхан нарын 18 хүний оффшор бүсэд данс эзэмшиж байгааг хайж олоод баримтуудыг АТГ-т өгсөн. Үүнээс хойш  22 хоног өнгөрөөд байна. АТГ хуулийнхаа дагуу  30 хоногт багтаан хариу өгөх ёстой байдаг.

- АТГ-аас энэ асуудалд ямар тайлбар өгч байна вэ?

-Энэ талаараа АТГ-т сая орж асуулаа. Тодорхой хариулт өгч чадахгүй байна. Хариу өгөхөд долоо хоног үлдээд байхад надаас ямар нэгэн байцаалт мэдүүлэг аваагүйг бодоход хугацаандаа ямар нэгэн ажиллагаа хийхгүй юм байна. Сү.Батболд, Х.Баттулга, Б.Дэлгэрсайхан нарыг шалгуулах гээд өгөхөөр яагаад ажиллахгүй байгаа юм бэ. Хүн нэг оффшороо хэлээгүй бол мартсан байна гэж ойлгоно. Хоёрдахиа бол алдаа гаргасан гэж бодно. Монголын ёс гурав юм гээд гуравдахийг нь орхиж болно. Гэтэл арвын арван баримт дэлгэгдээд байхад яагаад шалгахгүй байгаа юм бэ. Ерөнхийлөгч ирэх тавдахь өдөр оффшорын асуудлаа дарах гэж жагсаал  цуглаан зохион байгуулах гэж байгаа юм билээ. Тиймээс бид асуудлыг нь орхихгүй, хуулийн байгууллагуудтай эцсээ хүртэл зууралдаж, шахаж шаардана, шударга ёсыг тогтооно.

-Ерөнхийлөгч ирэх баасан гарагт жагсаал цуглаан зохион байгуулахаар болсныг та хэллээ. Энэ мэдээллийг хаанаас авсан юм бэ?

-Бидний хувьд нийгэм, улс төрийн хүрээлэлд маш олон найз нөхөд байна. Дүүргийн АН-ынхан нийлж байгаад хийхээр төлөвлөсөн юм билээ. Тиймээс бууж өгч болохгүй. Иргэд хэн нэгний талд орохгүйгээр МАН, АН-ын хулгайчдын бүх материалыг хуулийн байгууллагаар шалгуулж, араас нь явах хэрэгтэй. Энэ бол кино биш. Эцсийн хариу гартал бид явах болно гэдгийг дахин хэлье.

У.Тэргэл