Баянзүрхийн XXVI хороог дүүрэгтээ хамгийн их хүн амтай ч хамгийн их хэл амтай нь хэмээн тодорхойлоод байгаа. Үнэндээ энэ хороонд тав хоногийн хөл хорио тогтоосон ч өнөөдрөөс буюу гуравдугаар сарын 19-нөөс цуцалж ч магадгүй хэмээн тус дүүргээс сонгогдсон УИХ-ын гишүүн Э.Энх-Амгалан чуулганы өчигдрийн хуралдаанд яаравчлан тайлбар хийлээ. Доог, тохуу гэх үү, бүхэл бүтэн хорооны 31 мянган оршин суугчдыг өглөө сэрэхэд нь гэнэт хорьчихоод  эцэст нь энэхүү шийдвэрийг УОК-ын даргын тушаалыг үндэслэн гэж эхлээд ХӨСҮТ-ийн А.Амбасэлмаа, дүүргийн Засаг дарга, Шуурхай штабынхан байсан. Дүүргийн Эрүүл мэндийн төвөөс журам гаргасан. Тиймээс хөл хориог тогтоосон гэлээ.

Төр, засгийн тэр дундаа УОК-ын даргын .... тоот тушаалыг  үндэслэн хэдхэн хүн ширээ тойрч  суугаад ийм шийдвэр гаргаж байна. Дээрээс өгсөн үүрэг даалгаврыг үл ойшоодог, шат шатандаа дур мэдэн шийдвэр гаргадаг, иргэдийн эрхийг үл хүндэтгэдгийн тод жишээ энэ болж байна. Мөн энэ өдөр тус хорооны Засаг даргыг чөлөөлөх болсон нь асуудлыг улам хурцатгасан.

Хамгийн гол нь, Баянзүрх дүүргийн Засаг дарга  Н.Баярмөнх оршин суугчид гэрээсээ дүрвэнэ хэмээн болгоомжлон мэдээллийг орой хүргэсэн гэдгээ хүлээчихсэн. Харин Шадар сайд С.Амарсайхан ийм бүдүүлэг харгис хэрцгий шийдвэр гаргаж болохгүй хэмээн ихээхэн ундууцсан юм.

У.Хүрэлсүхийн Засгийн газар өмнө нь яагаад огцорсныг  нийгэм даяараа мэдэж байгаа. Харин энэ байдал   үргэлжилсээр хэсэгтээ л тасрахгүй бололтой. Цар тахлын үеийн шат шатны байгууллагын ажил өнөөдөр ийм л явна. УОК-оос давсан шийдвэр гэж баймгүй санагдана. Гэвч бодит байдал ийм л байна.

 У.Тэргэл