Коронавирусний цар тахлын талаарх Эрүүл мэндийн яамны ээлжит мэдээллийн үеэр ЦЕГ-ын Хэвлэл мэдээллийн хэлтсийн дарга Б.Баатархүү мэдээлэл өглөө. Тэрбээр "Коронавирусний цар тахалтай холбоотойгоор хууль тогтоомж зөрчсөн асуудлыг цагдаагийн байгууллага шалгаж байгаа талаар мэдээлэл хүргэе. 

"Энх саран" сувилал халдварийн дэглэм зөрчсөн асуудлыг шалгаж байгаа. Нийтдээ "Энх саран" сувилалтай холбогдох 13 хүнд эрүүгийн хэрэг үүсгэх санал хүргүүлсэн. Гадаадаас ирсэн тээврийн жолоочийг нэг байранд байлгах зэрэг хууль тогтоомжийг зөрчсөн зэрэг асуудлыг шалгаж байна. Холбогдох албан тушаалтнуудыг яллагдагчаар татахаар эрүүгийн хэрэг үүсгэх саналаа прокурорт хүргүүлжээ. Мөн тусгаарлах байрны дэглэм зөрчсөн 5 иргэнд эрүүгийн хэрэг үүсгэх саналыг прокурорт хүргүүлсэн байна. Тусгаарлалтад байсан иргэдийг өдөөн турхирсан хоёр иргэнд мөн хариуцлага тооцохоор саналаа прокурорт хүргүүлсэн. 

Мөн ХӨСҮТ-ийн Тандалт судалгааны төвийн ажилтан хамаарал бүхий этгээддээ шинжилгээний хариу хууль бусаар гаргаж өгснийг тогтоон шалгаж байгаа. Түүнчлэн ХӨСҮТ-ийн удирдлагууд цар тахалтай холбоотойгоор тендер, худалдан авалтыг хууль зөрчин зохион байгуулсан асуудал гарсан. Энэ хэргийг харьяаллын дагуу АТГ-т шилжүүлсэн" гэлээ.

Б.Баатар