Коронавирусний цар тахлын энэ үед халдварын тоо өдрөөс өдөрт эрс нэмэгдэж байгаа ч авууштай нь дархлаажуулалт буюу иргэдийг вакцинжуулах ажил зохион байгуулалттайгаар хурдтай урагшилж байна.

Монгол Улсын Ерөнхий сайд Л.Оюун-Эрдэнэ, Эрүүл мэндийн сайд С.Энхболд нар хоёрдугаар сарын 23-ны өдөр вакцинжуулалтыг эхлүүлж, олны өмнө хамгийн анх тариулсан. Энэ цагаас хойш нэг сар гаруйн хугацаанд нийтдээ 204,129 хүнийг вакцинжуулалтад хамруулаад байна.  

Одоогийн байдлаар Энэтхэг улсад үйлдвэрлэсэн 75 мянган хүн тун Астразенека вакцин, БНСУ-д үйлдвэрлэсэн 7200 хүн тун Астразенека вакциныг тарьж дууссан бол Синофармын вакцины 150 000 хүн тунгаас 107,769 хүн тунг одоогоор хийгээд байна.

Засгийн газрын Хэвлэл мэдээлэлтэй харилцах газрын дарга Ц. Ганзориг “Дөрөвдүгээр сараас вакцин таталтыг үргэлжлүүлж, хоёрдахь тунтай холбоотой өдөрт 30 мянгаас доошгүй хүнийг вакцинд хамруулна. Халдварын голомтууд идэвхтэй байгаа Улаанбаатар хотын иргэдийг вакцинд хамруулах хугацаа тавдугаар сарын дунд үе гэж төлөвлөсөн. Үүний дараагаар дархлаажуулалтын ажил орон нутагт өргөн хүрээнд өрнөнө” хэмээн мэдэгдсэн билээ.

Анх дараалал үүсч, иргэдийг бухимдуулж байсан бол өдгөө нөхцөл байдал гольдролдоо орж, иргэд ямар ч бухимдалгүйгээр вакцинжуулалтдаа хамрагдаж, сэтгэл өндөр байна. Мөн одоогоор элдэв хүндрэл үүссэн асуудал гараагүй байна. Цаашид энэ хурдаараа явбал долоодугаар сар гэхэд нийт иргэнийхээ 60 хувийг вакцинжуулалтад хамруулна хэмээн тооцоод байгаа юм.

У.Тэргэл