“Энхсаран” сувилалд 2020 оны аравдугаар сард тусгаарласан иргэдээс коронавирусний дотоодын халдвар анх илэрсэнтэй холбоотойгоор зарим албан тушаалтнуудыг мөрдөн шалгах Ажлын хэсэг байгуулан ажиллаж эхэлсэн байна. Үүнтэй холбоотойгоор албан ажилдаа хариуцлагагүй хандсан зургаан албан тушаалтан, дэглэм зөрчсөн таван иргэн, бусдыг хууль бус үйлдэлд өдөөн турхирсан хоёр гээд нийт 13 иргэнийг яллагдагчаар татаж, эрүүгийн хэрэг үүсгэх саналыг одоогоор прокурорт хүргүүлжээ.  Үүнийг задалбал,

БНЭУ, БНСУ, ОХУ-аас ирсэн иргэд, тээврийн жолоочдыг нэг байранд байрлуулж, Эрүүл мэндийн сайдын баталсан тушаал, журам, холбогдох заалтыг ноцтойгоор зөрчсөн үндэслэлээр тухайн үеийн УОК, ЭМЯ, “Энхсаран” сувиллын удирдлагууд болох зургаан албан тушаалтанг  "Албан тушаал, ажил мэргэжилдээ хайнга хандсанаас болж улсад их хэмжээний хохирол учирсан байж болзошгүй" гэх үндэслэлээр яллагдагчаар татаж, эрүүгийн хэрэг үүсгэх саналаа өгсөн. 

Мөн тусгаарлах байранд байсан иргэдээс дураараа өрөө байраа сольсон, бусдын өрөөгөөр хэсч амны хаалтаа зүүгээгүй, дэглэм журмыг зөрчсөн гэх үндэслэлээр таван иргэнийг яллагдагчаар татаж, эрүүгийн хэрэг үүсгэх саналаа прокурорт  хүргүүлсэн.

“Энхсаран” сувилалд байсан хоёр иргэн тусгаарлалтад байсан иргэдийг өдөөн турхирч, эмх  замбараагүй байдал үүсгэсэн тул тэдгээрт Эрүүгийн хуулийн 15.6.1-ээр ял сонсгож, эрүүгийн хэрэг үүсгэх саналаа прокурорын байгууллагад  тус тус хүргүүлсэн байна.