Энэ сарын 13-аас эхлэн улсын хэмжээнд тасралтгүй 100-аас дээш халдвар бүртгэгдэж, Хөвсгөл, Завхан, Баян-Өлгий, Төв аймагт шинээр халдварын тохиолдлууд бүртгэгдэв. Нийслэлээс орон нутаг руу халдвар зөөвөрлөгдөн тархах эрсдэл өндөр байгаа бөгөөд иргэд шинжилгээний хариугаа хүлээлгүйгээр орон нутаг руу зорчсоноос эрсдэлийг улам нэмэгдүүлж байна гэж албаныхан анхааруулсаар байна.

Одоогоос сар гаруйн өмнө нийслэлийн хэмжээнд 12 хоногийн хатуу хөл хорио тогтоож, “Нэг хаалга-нэг шинжилгээ” арга хэмжээ явуулж халдвараа шүүрдсэн. Энэ өдрөөс хойш халдварын өдөрт нэмэгдэх тоо хэмжээ эрс багассан ч хаанаас үл мэдэгдэх өөрөөр хэлбэл, эх уурхай нь тодорхой бус халдварууд сүүлийн өдрүүдэд ихээр нэмэгдэх болсон нь иргэдийг эргэлзүүлж байна. 12 хоногийн хугацаанд хөл хорьж авсан шинжилгээ нь үр дүнтэй байж чадсан уу гэх “хардлага”.

Сүүлдээ ХӨСҮТ-ийн эрх бүхий албан тушаалтнууд “сөрөг” гэх шинжилгээний бичгийг мөнгөөр үнэлж зардаг болох нь тогтоогдож эх уурхай нь тодорхой халдварууд үүнтэй холбоотой төдийгүй орон нутаг руу зорчсон иргэд ч ийм маягаар хуурам шинжилгээний бичиг авсан байж болзошгүй гэх таамаг гаргаж байгаа ажээ.

 Халдварын тоо бурахгүй нэмэгдсээр. Хэрэв 200 давбал хөл хорио дахин тогтоож магадгүй талаар бор шувуу ч нисээд эхэлсэн. Үнэхээр халдвар ингэж их гараад байна уу эсвэл сонгууль угтсан иргэдийг айлгах хэрэгсэл уу гэж асуулт эрэх иргэд ч олон байна. Ямартай ч эрүүл мэндийн байгууллагаас өгч буй өдөр бүрийн мэдээгээр халдвар 200 давахад тун дөхөж байна. Одоо хэн нэгнийг буруутгаж халаглаж суухын оронд хүн бүр дор бүрнээ хичээж, халдвар хамгааллын дэглэмээ сайтар баримталж, хүн ихээр холхидог газраар болж өгвөл явахгүй байх, шаардлагатай тохиолдолд өөрийгөө сайтар хамгаалж нийгмийн харилцаанд оролцох шаардлагатай байна. Ажлын байран дээрээ ч амны хаалттайгаа суухад гэмгүй.

А.Сүх