Сүүлийн жилүүдэд сэтгэл сэрд хийлгэм аймшигт хэрэг гарч, нийгмийг цочирдуулах болсон. Хэдэнтэй мэдээлж, сэрэмжлүүлдэг ч цоожтой хаалганы цаана хүчирхийлэл үйлдэгдэж, хэн нэгэн түүний золиос болсоор байгаа нь харамсалтай.
Саяхан л гэхэд Баянзүрх дүүргийн 26 дугаар хороонд байрлах “Элизабет” хотхоны 15 давхраас нэгэн эмэгтэй унаж, амь насаа хохироосон хэрэг гарсан. Тус хэргийг цагдаагийн байгууллага шалгаж байгаа бөгөөд нөхрийг нь сэжигтнээр татан хорьсон гэдгийг Цагдаагийн Ерөнхий газрын хэвлэл мэдээллийн төвийн дарга Б.Баатархүү мэдээлсэн.
Эх сурвалжийн өгүүлж буйгаар тухайн хохирогч эмэгтэй гэр бүлийн хүчирхийлэлд олон жил өртөж, улмаар амь насаа золиослоход хүрсэн гэх. Цаашилбал тухайн хохирогч эмэгтэйн нөхөр нь согтуурсан үедээ гэр бүлдээ агсам тавьсан гэх үндэслэлээр 9 удаа эрүүлжүүлэгдэж байсан байна.
ЦЕГ-ын даргын 2019 оны А301 дүгээр тушаалаар Гэр бүлийн хүчирхийлэлтэй тэмцэх хэлтсийг шинээр байгуулсан. Тус хэлтсийн үндсэн зорилго нь гэр бүлийн хүчирхийлэлтэй тэмцэх тухай хуулийн хэрэгжилтийг хангах, энэ төрлийн гэмт хэргээс урьдчилан сэргийлэх, таслан зогсоох, иргэдийн эрх зүйн мэдлэгийг дээшлүүлэхэд орших учиртай. Гэтэл 9 удаа агсам тавьж эрүүлжүүлэгдэж байсан иргэний ар гэрийг яагаад судлаж, арга хэмжээ авсангүй вэ. Үнэхээр хариуцлагагүй, харамсалтай асуудал.
Тэгвэл өчигдөр ч мөн Онцгой байдлын албанд цоожтой хаалганы цаана гэр бүлийн хүчирхийлэл үлдэгдэж байна гэх дуудлага ирсэн байна.
Тодруулбал нийслэлийн Сонгинохайрхан дүүргийн 7 дугаар хороо, 4 дүгээр байранд хаалга онгойлгох шаардлагатай байна гэсэн дуудлагыг 03.23-ны өдрийн 01:17 цагт хүлээн авсан. Нийслэлийн Аврах анги-105-ын алба хаагчид 12 км замыг туулан 01:31 цагт очиж 2 минут ажиллан хаалгыг онгойлгоход иргэн Х /31 настай, эрэгтэй/ согтууруулах ундаа хэрэглэсэн үедээ гэр бүлийн хүчирхийлэл үйлдэж байсныг тус дүүргийн Цагдаагийн хоёрдугаар хэлтсийн эргүүлд хүлээлгэн өгчээ.
Гэр бүлийн хүчирхийлэлтэй тэмцэх тухай хуулийг 2016 оны арванхоёрдугаар сарын 22-ны өдөр батлаж, 2017 оны хоёрдугаар сарын 1-нээс хүчин төгөлдөр мөрдөгдсөн. Зөрчлийн тухай хуулийн 5.4-д гэр бүлийн хүчирхийлэл үйлдсэн этгээдэд 7-30 хоног баривчлах шийтгэл ногдуулж, албадан сургалтад суулгахаар заасан. Үүнээс өөр торгох болон бусад шийтгэл байхгүй. Өөрөөр хэлбэл, зөвхөн баривчлах шийтгэлтэй учир нэлээн хатуу шийтгэлтэйд тооцогддог. Тиймээс ч гэр бүлийн хүчирхийлэл буурч байна хэмээн албаныхан мэдээлж, тоо баримт дэлгэдэг.
Гэтэл хөрсөн дээр байдал энэ мэтээр үргэлжилж цоожтой хаалганы цаана хүчирхийлэл үйлдэгдсээр байна.
Б.Баатар
