ЦЕГ-ын Хэвлэл мэдээллийн төвийн дарга Б.Баатархүү үүсээд буй нөхцөл байдалтай холбоотойгоор хэвлэлийнхэнд тайлбар өглөө.

-Нэг иргэн өндрөөс унаж бэртэж, гэмтсэн хэргийн талаар мэдээлэл өгөөч. Шалтгааныг нь тодруулсан уу?

-Хүн өндрөөс уналаа гэх дуудлага Хан-Уул дүүргийн цагдаагийн хэлтэст ирсэн. Энэ дагуу шалгахад тус дүүргийн IV хорооны нутаг дэвсгэрт байрлах Ханбогд хорооллын гурван давхраас 31 настай эрэгтэй унасан байсан. Тэрбээр гэрийнхэн нь гаргахгүй гэснээс болж тагтаараа гадагш гарах гэж байгаад ийнхүү унаж, бэртсэн.

-Замын цагдаагийн алба хаагч төрөх гэж явсан эмэгтэйг явуулахгүй, автомашиныг нь хураахыг завдсан гэх мэдээлэл гарсан. Энэ асуудлыг тодруулав уу?

-Замын цагдаагийн алба хаагчидтай холбоотой мэдээлэл гарсан. Жирэмсэн эмэгтэйг төрөх гэж явахад замын цагдаа зогсоож, явуулахгүй байсан, автомашиныг нь журамлах гэсэн гэх мэдээллийг шалгасан. Тухайн цагдаагийн камерийн бичлэгт шалгалт хийлээ. Тэрбээр Баянгол дүүрэгт шөнийн 00 цагийн үед явж байсан автомашиныг зогсоож шалгахад 25 настай И нь тээврийн хэрэгсэл жолоодох эрхээ хасуулсан мөртлөө машин жолоодож явсан. Нийслэлд 23 цагаас хойш хөдөлгөөнийг хориглоод байгаа шүү дээ. Ном журмын дагуу бол тээврийн хэрэгсэл жолоодох эрхгүй хүнийг 200 нэгжээр торгож, автомашиныг нь журамлах ёстой. Харин ч тухайн замын цагдаа нөхцөл байдлыг ойлгон автомашиныг нь журамлаагүй явуулсан байсан. Цагдаа шаардлага тавихад жолоочийн дэргэд суусан жирэмсэн эмэгтэй эсэргүүцэл үзүүлсэн байсан. Тэд эмнэлэг бус гэр рүүгээ явж байсан юм билээ.

-Цагдаа нарт зодуулсан гэх иргэн Төв талбайд өлсгөлөн зарлахаа мэдэгдэж, эсэргүүцлээ илэрхийлсэн. Энэ хэргийг шалгасан уу?

-Баянгол дүүрэгт нэгэн иргэн мөнгөөр шоо тоглуулж, иргэдийг залилаад байна гэх дуудлага цагдаагийн байгууллагад ирүүлсэн. Энэ дагуу очиж шалгахад Б гэгч шоо тоглуулж байсан ба түүнд хуулийн дагуу арга хэмжээ авах гэхэд өөрөө гудамжинд уначихаад цагдаа зодлоо гэх худал мэдээлэл тараасан. Цаашлаад Сүхбаатарын талбай дээр очиж цагдаа нар зодлоо, өлсгөлөн зарлана хэмээсэн. Цагдаагийн байгууллагаас энэ бүх үйлдэлд нь мөрдөн шалгах ажиллагааг эхлүүлээд байна. Анхны нөхцөл байдал ийм байна. Цагдаагийн алба хаагч хууль ёсны шардлага тавьж, арга хэмжээ тооцсон байна. Гэтэл цагдаа хүч хэрэглэн зодлоо гэж худал мэдээлэл тарааж буй нь харамсалтай.

У.Тэргэл