Орхон аймагт өчигдөр коронавирусний тохиолдол батлагдан, өндөржүүлсэн бэлэн байдлын зэрэгт шилжсэн. Аймгийн Онцгой комиссоос шуурхай хариу арга хэмжээ авч, Хивсний үйлдвэрийн 538, “Эрдэнэт үйлдвэр” ТӨҮГ-ын 3700 ажилчдаас шинжилгээ авахад 13 хүнээс коронавирусний халдвар илэрчээ. Энэ талаар Орхон аймгийн ЭМГ-ын дарга Д.Сүхээ “Гуравдугаар сарын 24-ний 11 цагийн үед бүсийн оношилгоо эмчилгээний төвд иргэн Г халуурах, ханиалгах, мөн цээж хөндүүрлэсэн гэсэн зовиуртай амбулаторийн тасагт ирж үзүүлсэн. Тухайн иргэнээс түргэвчилсэн оношлуураар шинжилгээ авахад хариу нь эерэг гарсан.

Тиймээс уг иргэнийг яаралтай тусгаарлаж, шуурхай хариу арга хэмжээ авсан бөгөөд PCR шинжилгээ хийхэд хариу батлагдсан. Өвчтөний ойрын хавьтал болох найман иргэнээс түргэвчилсэн шинжилгээ авахад гэр бүлийн гурван иргэний хариу эерэг гарсан. Мөн ойрын хавьтал болох 116,  дам хавьтлын 175 хүнийг тогтоосон”гэлээ.

Цаашлаад шуурхай арга хэмжээний хүрээнд хивсний үйлдвэрийн 538 ажилтан Эрдэнэт үйлдвэрийн 3700 ажилчдаас урьд шөнийн турш түргэвчилсэн шинжилгээ авахад хивсний үйлдвэрээс дөрөв, Эрдэнэт үйлдвэрийн  таван ажилчны шинжилгээ эерэг гарчээ. Түүнчлэн тандалт шинжилгээгээр "Дэгдээхий" цэцэрлэгээс нэг, Есөн-Эрдэнэ худалдааны төвийн хоёр иргэнээс түргэвчилсэн оношлуураар вирус илэрсэн байна. Ийнхүү батлагдсан нийт тохиолдол 13 болжээ.

У.Тэргэл