Оюутны хөгжлийн зээлийг 2016-2017 оны хичээлийн жилд таван хувийн хүүтэй олгож, давхар банкны барьцаа шаарддаг байсныг 2018 онд хүүгүй, барьцаагүй, гэр бүлд санхүүгийн дарамтгүй болгох зорилгоор зээл олгох журмыг өөрчилсөн билээ. Энэ цагаас хойш хөгжлийн зээл авах оюутны тоо эрс нэмэгдэж, Засгийн газраас ч жил бүрийн төсөвт хөрөнгийг нь тусгаснаар их, дээд сургуульд суралцахыг эрмэлзэх залуусын тоо нэмэгдсэн давуу талтай.

Харин энэ жилийн хувьд 5028 оюутан хөгжлийн зээл авах болзол хангасан ба энэхүү сургалтын төлбөрийг нь сургуулийнх нь данс руу энэ долоо хоногтоо багтаан шилжүүлэхээр болсон гэдгийг Боловсролын зээлийн сангийн захирал Ж.Ариунболд хэлсэн.  Энэ ч үүднээсээ олгож эхэлсэн байна.

Оюутны хөгжлийн зээлийг жил бүр 4000-5000 оюутанд олгодог ба энэ жилийн хувьд 5028 оюутанд 8,1 тэрбум төгрөгийн санхүүжилтийг олгохоор болсон байна. Тухайн оюутан сурч байгаа их, дээд сургуульдаа зээлээр суралцаж сургуулиа төгссөнөөс хойш зургаан жилийн дотор тэрхүү төлбөрийг эргүүлэн төлдөг зарчимтай. 2018 оноос хойш оюутны хөгжлийн зээлийн хүрээнд жил бүр 4000-5000 оюутан зээл авч, төлбөрөө хугацаанд нь бүрэн төлсөн байна.

Монгол Улсын төсөвт энэ жилийн хувьд 24,7 тэрбум төгрөгийг оюутны хөгжлийн зээлд олгохоор баталсан ба жил бүрийн төсөв харилцан адилгүй байдаг учраас хамрагдах оюутны тоо хэлбэлзэлтэй байдаг аж. Тухайлбал,  

-2018 онд 9231 оюутны 13 тэрбум,

-2019 онд 18649  оюутанд 26,5 тэрбум,

-2020 онд 4753 оюутанд 6,3 тэрбум төгрөгийг тус тус баталж, олгож байжээ.

Оюутны хөгжлийн зээлийг зургаан жилийн дотор төлж барагдуулах бүрэн боломжтой. Хэрэв хугацаандаа төлөөгүй тохиолдолд Монголбанкны зээлийн мэдээллийн санд муу түүх үүснэ. Мөн оюутны хөгжлийн зээлээр дотоодын их, дээд сургуульд суралцахаас гадна гадаадын их, дээд сургууль, коллежид ч суралцах бүрэн боломжтойгоороо давуу юм. Тиймдээ ч сүүлчийн гурван жилд 40-50 оюутан гадаадын нэр хүндтэй сургуульд хамрагджээ. Харин дотоодын их, дээд сургуульд 1993-2019 оны хооронд нийт 169 мянган оюутан оюутны хөгжлийн зээлд хамрагдсан байна.

У.Тэргэл