Барилга, хот байгуулалтын яамнаас өнөөдөр цаг үеийн асуудлаар мэдээлэл хийлээ. Мэдээллээр Засгийн газрын үйл ажиллагааны хөтөлбөрийн хүрээнд 2020 оны аравдугаар сарын 1-нээс Ипотекийн 6 хувийн хүүтэй зээл олгож эхэлсэн гэдгийг онцлоод, 2021 оны гуравдугаар сарын 23-ны байдлаар нийт 1673 зээлдэгчид 126,6 тэрбум төгрөгийн Ипотекийн зээл олгосон гэлээ.
Өнгөрсөн онд улсын хэмжээнд 15639 айлын орон сууцыг ашиглалтад оруулснаас 5594 нь төрөөс хэрэгжүүлж буй Ипотекийн зээлд, 5691 нь арилжааны банкуудын эх үүсвэрээр олгосон Ипотекийн зээлээр борлуулсан байна. Өнгөрөгч 2020 онд төрөөс хэрэгжүүлж буй Ипотекийн зээлийн эх үүсвэрт 410 тэрбум төгрөгийг зарцуулсан байна.
Барилга, хот байгуулалтын яамнаас 2021 оны I улиралд хийсэн зах зээл дэх орон сууцны судалгаанаас үзэхэд 1816 айлын орон сууцыг борлуулаагүй байгаа бол 2021 онд 23591 айлын орон сууцыг барилгын салбарын аж ахуйн нэгжүүд шинээр ашиглалтад оруулахаар төлөвлөн ажиллаж байгаа аж.
Мөн 2021 онд Ипотекийн зээлийн хэмжээг ойролцоогоор 700-800 тэрбум төгрөг хүртэл нэмэгдүүлэхээр Монголбанктай тохирч, Улаанбаатар хотын төвлөрлийг сааруулж, ажлын байртай уялдуулах үүднээс ипотекийн зээлийн санхүүжилтийн 25-30 хувийг хөдөө орон нутагт тогтвортой олгохоор болжээ.
