Улсын онцгой комиссын шуурхай штабаас мэдээлэл хийлээ. ОБЕГ-ын Гамшгийн эрсдэлийн удирдлагын газрын дарга, хурандаа Д.Баасансүрэн "Улсын онцгой комиссын аравдугаар хуралдаанаар Улаанбаатар хотоос орон нутаг руу зорчих хөдөлгөөнийг 2021 оны гуравдугаар сарын 28-ны өдрийн 06 цагаас дөрөвдүгээр сарын 11-ний өдрийн 06 цаг хүртэл хориглох шийдвэр гаргасан.

Энэ хугацаанд эрүүл мэнд, буяны ажлаар орон нутагт зорчих зэрэг хүндэтгэх шалтгаантай иргэд тухайн зорчин очих аймгийнхаа онцгой комиссын шийдвэр, мөн PCR шинжилгээний бичгийг үндэслэн зорчих хөдөлгөөнд оролцож болно.

Харин тухайн газраа очоод долоо хоног гэрийн тусгаарлалтад байх ёстой. Мөн аж ахуйн нэгж байгууллагын хувьд зайлшгүй шаардлагагтай ачаа тээвэр буюу хүнс, шатахуун, эм, эмнэлгийн хэрэгсэл, өвс тэжээл, уул уурхайн тээвэр нь зөвшөөрөгдөнө. 

Коронавирусний халдвар бүртгэгдсэн аймгуудыг "Улаан" түвшинд шилжүүлсэн. Энэ түвшнийхээ дагаж мөрдөх журмыг баримтлах учиртай. 

Нүүрс, уул уурхайн бүтээгдэхүүний тээвэр явдаг Дорноговь, Өмнөговь аймгийн зорчих хөдөлгөөнийг гуравдугаар сарын 28-ны өдрийн 06 цагаас эхлэн мөн 14 хоног зогсоохоор болсон. Ингэхдээ хөдөлгөөний зохицуулалт нь тусгайлсан журмаар явж байгаа.

Тодруулбал, зайлшгүй шаардлагатай буюу буяны ажил, хүнс, шатахуун, эм, эмнэлгийн хэрэгсэл, өвс тэжээлийн тээвэр нь зөвхөн УОК-ын Шуурхайн штабын зөвшөөрлийг үндэслэн хөдөлгөөн үйлдэж болно.

Бид тус зөвшөөрлийн үндэслэлийг маш нарийн судлаж олгох болно. Ингэж байж дээрх хилийн бүс болох газруудаа ногоон бүс болгож, тээвэрлэлтээ үйлдэх боломжийг бүрдүүлэх юм. Түүнчлэн хилийн бүс болох сумдын иргэдийг вакцинжуулах ажлыг энэ сарын 29-ны өдрөөс эхлүүлэхээр боллоо" гэв.

Б.Баатар