Боловсрол, шинжлэх ухааны сайд Л.Энх-Амгалан хуваарийн дагуу эхлэх сурагчдын амралтыг цуцалж, теле болон цахим хичээлийг үргэлжлүүлэх тушаал гаргасан нь энэ салбарынхныг цаашлаад эцэг, эхчүүдийг бухимдуулж, шүүмжлэлд өртөөд байсан билээ. Харин коронавирусний халдварын тархалттай холбоотойгоор энэхүү шийдвэрээ өөрчилж, ирэх даваа гараг буюу гуравдугаар сарын 29-нөөс амралтыг эхлүүлэхээр тогтлоо.

Ерөнхий боловсролын сургуулийн сурагчдын улирлын амралт долоо хоног үргэлжлэх юм. Энэ талаар БШУЯ-ны Бага, дунд боловсролын газрын дарга Т.Ням-Очир: “Сурагчдын хоцрогдол их байсан учир аймгуудаас хүсэлт гаргаж, хоёрдугаар улирлын амралтыг цуцалж өгөхийг хүссэн. Тиймээс долоо хоногийн өмнө Боловсрол, шинжлэх ухааны сайд хичээлийг үргэлжлүүлэх шийдвэр гаргаад байсан. Гэвч цар тахлын тархалт газар авч, 10 гаруй аймагт тохиолдол бүртгэгдлээ. Тиймээс цаг үеийн нөхцөл байдалтай уялдуулан дахин шийдвэр гаргаж, улирлын амралтыг даваа гарагаас эхлүүлэхээр болсон” гэлээ.

Харин сурагчдын амралтын долоо хоногийн хугацаанд сургууль, анги танхимд ариутгал халдваргүйжүүлэлтийг хийх ба  ариутгалын бодисыг нийслэл, аймаг, сумдын ерөнхий боловсролын сургууль, цэцэрлэгт хүргүүлж эхэлсэн байна.

У.Тэргэл