ЭМЯ-наас коронавирусний халдварын нөхцөл байдлын талаар ээлжит мэдээллээ хийж, энэ үеэр ХӨСҮТ-ийн Дархлаажуулалтын албаны дарга О.Дашпагма "Дэлхий дахинд 267 вакциныг хөгжүүлж байгаагаас 83 нь эмнэлзүйн туршилтад ороод явж байна. Өдөрт дундажаар 14.5 сая хүнд вакцин хийж байна гэсэн тоон мэдээ байна. Монгол Улс нийт хүн амынхаа 60 хувийг дархлаажуулах вакцин авахаар ажиллаж байна" гэлээ.

Манай улсад нийлүүлсэн нийт вакцины 14.3 хувийг БНХАУ, БНЭУ-аас авсан бол 30 хувийг нь ирэх сард ирэх “Спутник V”, Синофарм, АстраЗенека вакцинаар бүрдүүлэх аж. Мөн ирэх дөрөвдүгээр сардаа багтаж 1.1 сая хүнээ вакцинжуулна гэсэн төлөвлөгөөтэй ажиллаж байгаа гэлээ.

Монгол Улсын хэмжээнд Улаанбаатар хот, Төв, Дархан, Дорноговь, Өмнөговь зэрэг аймагт вакцинжуулалт эхэлсэн. Зорилтот бүлэг болох 1.9 сая иргэнийг вакцинжуулахаар ажиллаж байгаа аж. Хамгийн эхэнд эмч, эмнэлгийн ажилчид, хариу арга хэмжээнд оролцож байгаа багийнхан, 50-иас дээш насныхан, худалдаа үйлчилгээний байгууллагынхныг вакцинд хамруулжээ. Вакцинжуулах үйл ажиллагаа цаашдаа үргэлжилнэ. Вакцины дараа илэрч байгаа урвалыг тандаж үзэхэд одоогоор ноцтой хүндрэл, урвал бүртгэгдээгүй хэмээн ХӨСҮТ-ийн албаны дарга О.Дашпагма мэдээллээ.