Зэвсэгт хүчний 326 дугаар ангийн хугацаат цэргийн алба хаагч  21 настай Б-г харуулд гарч байхад нь тус ангийн салаан захирагч, дэслэгч 25 настай Г согтуугаар зодож танхайрснаас тархиндаа хүнд гэмтэл авч, ТТАХНЭ-т хүргэгдсэн юм. Эмнэлэгт хүргэсэн даруйд түүнийг эрчимт эмчилгээний тасагт шилжүүлж, эмчилгээг яаралтай эхлүүлсэн ч гурав хоног ухаан оролгүй байсаар урд шөнө харамсалтай нь нас барсан билээ. Эмч нарын хэлж буйгаар, тухайн цэрэг уушгины хатгалгаа, тархины цус харвалт, зүрхний дутагдлын шалтгааны улмаас нас барсан гэлээ.

Харин ноцтой энэхүү явдал гарсны дараахан Хуурай замын цэргийн штабын дарга, бригадын генерал Л.Онцгойбаяр "Зэвсэгт хүчний 326 дугаар ангийн удирдлага, шат дараалсан албан тушаалтнуудад хатуу хариуцлага тооцно. Мэдээж Хуурай замын цэргийн командлалын удирдлагууд бид ч гэсэн хариуцлага хүлээхэд бэлэн"  хэмээн мэдэгдсэн билээ.

Харин одоо хэлсэндээ хүрч, хариуцлагаа хүлээх цаг ирж байна. Ганц энэ удаагийнх бус өмнө олон зуун залуус эр цэргийн албанд мордсон ч амиа алдаж, тахир дутуу, эрэмдэг болсон жишээ олон. Энэ бүхэнд хариуцлагын асуудлыг сөхдөг ч биеллээ олсон нь үгүй. Тиймээс энэ удаад бултаж, булзахаас илүүтэй хийсэн мэдэгдэлдээ эзэн болж, генерал Л.Онцгойбаяр та болон бусад буруутай хүмүүс хариуцлагаа хүлээж, огцорно уу.

У.Тэргэл