Шүлснээс “Ковид-19”-ийг илрүүлэх дотооддоо үйлдвэрлэсэн оношлуурыг хэрэглээнд нэвтрүүлж эхэллээ. Энэ талаар АШУҮИС-ийн багш Г.Чимэдлхамсүрэн “Монгол эрдэмтдийн бүтээсэн коронавирусийг шүлснээс илрүүлэх оношлуурын сав нь 5 мл багтаамжтай ба сараас дээш хугацаанд сорьцыг тээвэрлэх боломжтой. Одоогоор манай улс 4000 оношлуурын нөөцтэй байгаа” гэлээ.

“Ковид-19”-ийн шинжилгээг шүлсээр өгөх зөвлөмж, дараалал,

1.      Шүлсийг сорьц цуглуулах саванд хийх

Шүлс цуглуулах савыг амандаа ойртуулан барьж, шүлсээ бага багаар гоожуулна. Шүлсийг савны дунд хэсэг хүртэл хийнэ.

2.      Шүлстэй савыг сайтар таглах

Юүлтүүрийг авч хаяна. Дараа нь шүлстэй савыг эргэдэг тагаар сайтар таглана. Шүлсний хэмжээг шингэн хэсгээр тооцно.

3.      Шүлстэй савыг шинжилгээнд өгөх

Шүлсний хэмжээ хэт бага байж болохгүй. Мөн хөөсийг тооцохгүй. Шүлстэй савыг шинжилгээнд өгнө.

Шинжилгээний хариу 2-3 цагийн дотор гарах ба хариуг https://eruul.gerege.mn/public/eruul сайтаас авах боломжтой юм байна.

Шүлснээс коронавирусний шинжилгээг өгөхөд төлбөр төлөхгүй бөгөөд урьдчилан цаг авахгүй. Мөн нэг хүнээс шүлсээр шинжилгээ авахад дунджаар 3-5 минут зарцуулах ба шинжилгээ өгөхөөс өмнө амаа зайлаагүй. Шингэн зүйл уугаагүй. Хоол идээгүй. Тамхи татаагүй байх ёстой. Шинжилгээнд өгөх шүлсийг хүчилж гаргахгүй. Амны хөндийд цугласан цэвэр шүлс байх ёстойг иргэд анхаарах хэрэгтэй юм байна.

У.Тэргэл