С.Зоригийн амийг хөнөөсөн хэрэгтээ 20 жилийн хорих ял сонсоод буй Т.Чимгээ, Б.Содномдаржаа нарыг суллах ганц л гарц, гаргалаа байна. Хуулийн талаасаа шүү дээ. Энэ нь тус хэргийн шүүх хуралд улсын яллагчаар оролцсон прокурорууд Улсын Дээд шүүхэд эсэргүүцэл бичиж, энэ дагуу УДШ гурван шатны шүүхийн шийдвэрийг хүчингүй болгосноор тэд эрх чөлөөтэй болох учиртай юм.

Хамгийн гол нь Улсын Дээд шүүх Б.Хурц, Г.Эрдэнэбат нарт 1-1,6 жилийн хорих ял оноосон нь улсын яллагчдад илүү боломжийг олгоно. Учир нь, Т.Чимгээ, Б.Содномдаржаа болон бусад холбогдогчдыг тэд эрүүдэн шүүсэн, гүйцэтгэх ажиллагааны хууль зөрчсөн гэдгийг нь тогтоон, энэ үүднээсээ хорих ял оноосон гэдэг нь тодорхой.

Харин С.Зоригийн амийг хэрцгий, балмадаар хөнөөсөн хэрэгт хяналт тавьж, улсын яллагчаар шүүх хуралдаанд оролцсон нь Нийслэлийн прокурорын газрын Хэрэг бүртгэх, мөрдөн байцаах ажиллагаанд хяналт тавих хэлтсийн дарга Ж.Сандагсүрэн, НПГ-ын Хэрэг бүртгэх, мөрдөн байцаах ажиллагаанд хяналт тавих нэгдүгээр хэлтсийн прокурор Б.Батжаргал нар юм. Харин одоо Т.Чимгээ, Б.Содномдаржаа нарын хувь заяа дээрх хоёр прокурорын гарт байна. Тэдний хэн нэг, аз таарвал хоёул эсэргүүцэл бичвэл С. Зоригийн амийг хөнөөсөн дуулиант хэргийг нэг шат ахиулна. Нэгэнт эрүүдэн шүүсэн, мөрдөж мөшгисөн, эрүү шүүлт тулгасан гэдэг нь ил болсон. Тиймдээ ч прокурор эсэргүүцэл бичвэл Улсын Дээд шүүх гурван шатны шүүхийн шийдвэрийг эргэн нягталж үзэх нь тодорхой юм.

Прокурор бол хэрэг бүртгэх, мөрдөн байцаах шатанд яллах болон цагаатгах талын баримтыг тэнцвэртэй цуглуулж байгаа эсэхийг хянах үүрэгтэй. Хэргийг мухарлан шалгасан гэж үзвэл прокурор гэдгээрээ бус улсын яллагчийн байр сууриар шүүх хуралд төрийн нэрийн өмнөөс оролцдог. Шүүх хуралд улсын яллагч ялын дүгнэлтээ, өмгөөлөгч цагаатгах талын байр сууриа хамгаалж тэгш эрхтэйгээр хоорондоо мэтгэлцдэг оролцогчид.

Эдгээр улсын яллагчид хэдэн жилийн өмнө МҮОНРТ-ээр Т.Чимгээ, Б.Содномдаржаа, Б.Булган, Ц.Амгаланбаатар, Б.Отгонбаатар нар шүүх хуралд хэрхэн мэдүүлсэн талаарх зарим нэгэн баримтыг дэлгэж, Б.Булганыг хэргийн захиалагч ч байж магадгүй. Энэ үйлдэлд шалгаж ч болзошгүй гэх мессежийг нийгэмд өгч байсан билээ. Дуулиант ноцтой хэргийн улсын яллагчид ийнхүү гэв гэнэт ярилцлага өгсөн нь  улс төрийн зорилготой хэмээн тухайн цаг үедээ шуугьж байв.

У.Тэргэл