МҮЭХ-оос нийгмийн даатгалын шимтгэлийн нэмэгдлийг эсэргүүцэж, Засгийн газарт шаардлага хүргүүлж байна.

МҮЭХ-ны дарга Х.Амгаланбаатар “Улс орны нийгэм, эдийн засаг хүнд байна. Ажлын байраа хадгалах, ажилчдаа хэрхэн цалинжуулах зэрэг асуудал нийгмийн бэрхшээлтэй асуудал болж байна. Энэ цаг үед ажилтан, ажил олгогчдын нуруун дээр очих ачаа улам нэмэгдэж байна.

Энэ оны нэгдүгээр сарын 1-ээс НДШ-ийн хэмжээг хоёр хувиар нэмэгдүүлсэн.

Үүнтэй холбогдуулан олон мянган ажил олгогч, ажилчид МҮЭХ-нд хандаж хоёрдугаар сарын 1-ээс цахим тэмцлийн үйл ажиллагаа орон даяар явуулсан. Үүний үр дүн Хөдөлмөр нийгмийн зөвшлийн үндэсний гурван талт хороо өнгөрсөн хоёрдугаар сарын 25-нд хуралдаж НДШ-ийг нэмэгдүүлэх шийдвэрийг 2022 оны нэгдүгээр сарын 1 хүртэл зогсоож, царцаах нь зүйтэй гэдэг шийдвэр гаргасан.

Хөдөлмөр нийгмийн зөвшлийн үндэсний гурван талт хороонд Засгийн газар, Монголын ажил олгогч эздийн нэгдсэн холбоо, МҮЭХ нар багтдаг.

Дээрх шийдвэр гарсны дараа Ерөнхий сайд Л.Оюун-Эрдэнэтэй уулзсан. Энэ үеэр нийгэм, эдийн засгийн байдал, НДШ-ийн талаар гаргасан шийдвэрээ танилцуулсан. Ерөнхий сайд УИХ-д яаралтай горимоор оруулж, шийдвэрлүүлэх нь зүйтэй гэсэн байр суурьтай байгаагаа албан ёсоор мэдэгдсэн. Гэтэл хоёрдугаар сарын 25-нд гарсан шийдвэр өнөөдрийг хүртэл хэрэгжээгүй байна.

Тиймээс Засгийн газарт шаардлага хүргүүлж байна.

Нэгдүгээрт, НДШ-ийг хувь хэмжээг нэмэгдүүлсэн шийдвэрийг 2022 он хүртэл хойшлуулж, царцаах. Хоёрдугаарт, НДШ-ийг хөнгөлж, чөлөөлөх асуудлыг төрийн болон хувийн хэвшлийн гэж ялгаварлал үүсгэхгүйгээр шийдвэрлэх, гуравдугаарт, Нийгмийн даатгалын Үндэсний зөвлөлд холбогдох хуульд заасны дагу даатгуулагчийг төлөөлж нийт ажилтны дийлэнх олонхийн эрх, хууль ёсны ашиг сонирхлыг төлөөлсөн гишүүдийг оруулж, хэлэлцүүлж томилохыг шаардаж байна” гэлээ.

Шаардлагын хариуг энэ сарын 14-нд авах бөгөөд хугацаанд нь явуулаагүй тохиолдолд тэмцлийн дараагийн хэлбэрт шилжинэ гэв.

А.Сүх